ასეთი ცინიზმი ადამიანის მხრიდან, გამოვიდეს და თქვას, რომ მე ვბრუნდები იქ, საიდანაც იგი არასოდეს არ წასულა, ნაკლებად მოიძებნება მსოფლიო პოლიტიკის ისტორიაში, - განაცხადა ენმ-ის ერთერთმა ლიდერმა ნიკა მელიამ.
მისი თქმით, ესეც ცალკე ტრაგედიაა, როდესაც ადამიანს მიაჩნია უბედურებად და მეორედ მოსვლად, როდესაც პარტიაში აქვს პრობლემა.
„თორემ, ის რომ ქვეყანაში მთელი 6 წლის განმავლობაში მართლაც მეორედ მოსვლაა და ტრაგედიაა, ეს არაფრად არ მიაჩნია, მაგრამ სანამ მუშტი-კრივი არ გამართეს ერთმანეთს შორის ქართულ ოცნებაში და სანამ უბრალოდ არ აგინებდნენ საპარალამენტო სხდომების მიმდინარეობისას, ეს ადამიანი თვლიდა, რომ არაფორმალური მმართველის ამპლუა კომფორტულია რა, თან ვმართავ და თან ხეებს გადავრგავ-გადმოვრგავ. მაგრამ აღარ იყიდება, აღარ დარჩა მე მგონი საზოგადოებაში არავინ, ვინც ამას დაიჯერებს, რომ ბატონი ივანიშვილი საიდანღაც ეხლა დაბრუნდა“, - განაცხადა მელიამ.
გიორგი კვირიკაშვილმა დღეს, 26 აპრილს, „ქართული ოცნების“ ოფისში, პარტიის ხელმძღვანელობისა და საპარლამენტო უმრავლესობიდან პარლამენტის ბიუროს წევრების შეხვედრის დასრულების შემდეგ განაცხადა, მან ბიძინა ივანიშვილს შესთავაზა პარტიის თავმჯდომარეობა, რაზეც თანხმობა მიიღო. ბიძინა ივანიშვილი სამომავლოდ პარტია „ქართულ ოცნებას“ უხელმძღვანელებს, რომელსაც ამ დრომდე მოქმედი პრემიერ-მინისტრი გიორგი კვირიკაშვილი ხელმძღვანელობდა.
გიორგი კვირიკაშვილი პარტიის თავმჯდომარედ 2016 წლის 14 მაისს, „ქართული ოცნება-დემოკრატიული საქართველოს“ ყრილობაზე აირჩიეს.
