საქართველომ ევროკავშირის წევრ სახელმწიფოებთან და აშშ-სთან ერთად, მხარი დაუჭირა უკრაინის მიერ წარდგენილ დოკუმენტს დროებით ოკუპირებული ყირიმის ავტონომიური რესპუბლიკისა და ქალაქი სევასტოპოლის ყირიმის ანექსირებულ ტერიტორიაზე რუსეთის ფედერაციის მიერ განხორციელებული უკანონო ქმედებების შესახებ.
საქართველომ მხარდაჭერა საერთაშორისო საზღვაო ორგანიზაციის (IMO) სამართლებრივი კომიტეტის სხდომაზე დააფიქსირა.
კერძოდ, საქართველომ დააფიქსირა პოზიცია, რომ “არცერთ წევრ სახელმწიფოს არ უნდა ჰქონდეს უფლება, ცალმხრივად და საკუთარი ნების საწინააღმდეგოდ, აიძულოს სუვერენული სახელმწიფო უარი თქვას იმ ვალდებულებებსა და უფლებებზე, რომლებიც IMO-ს კონვენციებიდან გამომდინარეობს.”
აღსანიშნავია, რომ საერთაშორისო საზღვაო ორგანიზაციის (IMO) სამართლებრივი კომიტეტის 105-ე სხდომა ლონდონში მიმდინარეობს. კომიტეტზე საქართველოს დელეგაციას ხელმძღვანელობს საქართველოს ეკონომიკისა და მდგრადი განვითარების სამინისტროს საზღვაო ტრანსპორტის სააგენტოს იურიდიული და საერთაშორისო ურთიერთობების დეპარტამენტის უფროსი ივანე აბაშიძე. შეხვედრაში ასევე მონაწილეობას იღებს საქართველოს ალტერნატიული წარმომადგენელი IMO-ში მერი ჩაკვეტაძე.