ამ წუთებში, თბილისის საქალაქო სასამართლოს შენობის ეზოში დავით როსტომაშვილზე თავდასხმის საქმეზე ერთ-ერთი მსჯავრდებულის, ზურაბ ქუთელიას ოჯახის წევრების და ახლობლების აქცია მიმდინარეობს. როგორც „ჯი-ეიჩ-ენთან“ ქუთელიას ცოლმა, ნათია ქარდავამ განაცხადა, ისინი აქციებს მომავალშიც გამართავენ და საქმეს სტრასბურგის სასამართლომდეც მიიყვანენ.
„ადამიანი სრულიად უკანონოდ დააკავეს და ასე მიუსაჯეს 7 წელი. ნათია გუდაძე სავარაუდოდ, როსტომაშვილებისგან მოსყიდული მოსამართლეა, რომელმაც ეს ყველაფერი გააკეთა. საქმეში არანაირი მტკცებულება არსებობს, ექსპერტიზის შედეგებით ზურას შემთხვევის ადგილზე ყოფნა არ დასტურდება. მხოლოდ და მხოლოდ, მამა-შვილ როსტომაშვილების ჩვენებით მიუსაჯეს მას 7 წლიანი პატიმრობა. წარმოდგენა არ გვაქვს, როსტომაშვილს ზურას მიმართ თუ რა ინტერესი შეიძლებოდა ჰქონოდა.
ასე უნდა ვიხმაუროთ, იქნებ ასე ხმაურით, აქციებით სააპელაციო სასამართლომდე მაინც მივაღწიოთ და იქ მაინც დავამტკიცოთ ჩვენი სიმართლე. თუ არადა, სტრასბურგამდე მივალთ და ამ საქმეზე გამამართლებელ განაჩენს აუცილებლად გამოვიტანთ. ზურა 7 წლიან სასჯელს იმის გამო არ მოიხდის, რომ ვიღაც ჩინოვნიკია და თავისი ფულით, სანაცნობოთი საქმის გაკეთება შეუძლია“, - განაცხადა ნათია ქარდავამ.
ცნობისთვის, 13 მარტს, თბილისის საქალაქო სასამართლომ როსტომაშვილზე თავდასხმის საქმეზე სამივე ბრალდებული დამნაშავედ ცნო. მოსამართლე ნათია გუდაძემ ზურაბ ქუთელიას 7 წლით, არტემ აგაჯანოვს 6 წლით, ხოლო ბექა კირვალიძეს 10 წლით თავისუფლების აღკვეთა მიუსაჯა.
