დავით როსტომაშვილის თავდასხმაზე ერთ-ერთი მსჯავრდებულის, ზურაბ ქუთელის ადვოკატი, გიორგი ბარდაველიძე „ჯი-ეიჩ-ენთან“ აცხადებს, რომ აღნიშნულ საქმეზე გამამტყუნებელი განაჩენის დადგომა დავით როსტომაშვილის სამსახურეობრივმა სტატუსმა განაპირობა, რადგან ის დღეს შსს-ს მოქმედი თანამშრომელია.
„ზურაბ ქუთელის მიმართ ასეთ განაჩენს ნამდვილად არ ველოდით იქიდან გამომდინარე, რომ ყველა მტკიცებუილებით დასტურდება, რომ ქუთელია დანაშაულის ადგილზე არ იმყოფებოდა. მოსამართლემ აღნიშნული გადაწყვეტილება რატომ მიიღო ვერ ვხვდები. მისი გადაწყვეტილება ჩემთვის დაუსაბუთებელია. ბრალდების მხარის მიერ წარმოდგენილი მტკიცებულებებიდანაც კი არ დასტურდებოდა ქუთელიას ბრალეულობა. ამ საქმეში მხოლოდ და მხოლოდ ვარაუდები იყო. შესაბამისად, აღნიშნული გამამტყუნებელი განაჩენი ვარაუდებზეა დაყრდნობილი, რასაც აუცილებლად გავასაჩივრებთ.
ამ გადაწყვეტილების მისაღებაში დავით როსტომაშვილის პირდაპირ მონაწილეობას და მისი ხელის ფათურს ვხედავ. დავრწმუნდი და ყველას დაგარწმუნებთ, რომ როსტომაშვილს ქუთელიას მიმართ პირადი ინტერესი ჰქონდა. ბრალდების მხარემ თავის დასკვნით სიტყვაშიც კი ვერ დაასაბუთა და ვერანაირი ლოგიკური ჯაჭვი ვერ შეკრა, თუ როგორ მოხდა სპორტდარბაზიდან წამოსული ზურაბ ქუთელია არტემ აგაჯამოვის მანქანაში. ვერც იმას მისაბუთებენ რა დროს მოახერხა სპორტდარბაზიდან სპორტულებით გამოსულმა ქუთელიამ აგაჯანოვის მანქანაში ტანსაცმლის გამოცვლა, იმ ადგილას დროულად მოხვედრა და როსტომაშვილის დაყაჩაღებაც. იმან, რომ როსტომაშვილი შსს-ს მოქმედი თანამშრომელია, დღევანდელ გადაწყვეტილებაზე გავლენა იქონია“ - განაცხადა გიორგი ბარდაველიძემ.
შეგახსენებთ, რომ დავით როსტომაშვილზე თავდასხმის საქმეზე ბრალდებულები სასამართლომ პატიმრობაში დატოვა.
ზურაბ ქუთელიას 7 წლით, აგაჯანოვს 6 წლით, ხოლო ბექა კირვალიძეს 10 წლით თავისუფლების აღკვეთა მიესაჯა.