"Freedom House-ს შეფასებებში აქცენტი ყოველთვის კრიტიკულ საკითხებზეა გაკეთებული", - ამის შესახებ საქართველოს პარლამენტის ვიცესპიკერმა, თამარ ჩუგოშვილმა განაცხადა.
მისივე თქმით, ქულების თვალსაზრისით საქართველოს შენარჩუნებული აქვს რეგიონში ყველაზე მაღალი შეფასება, ყველა ახლომდებარე ქვეყანასთან მიმართებით, რაც მნიშვნელოვანი და კარგია.
"რაც შეეხება კონკრეტულ წუხილებს, ჯერ საქართველოსთან, კონკრეტულად ქვეყანასთან დაკავშირებით ცალკე ანგარიში გამოქვეყნებული არ არის, მხოლოდ შემაჯამებელი დასკვნაა მოცემული. აფგან მუხთარლისთან მიმართებით ახალი არაფერია, ვიცით, რომ ამ საქმემ გარკვეული კითხვები გააჩინა და გამოძიების დასრულების ეტაპზე მნიშვნელოვანია, კითხვებს პასუხი გაეცეს, რადგან სხვადასხვა საერთაშორისო აქტორების მხრიდან დაფიქსირდა გარკვეული შენიშვნები და ანგარიშის სრულად გამოქვეყნების შემდგომ უფრო დეტალურად იქნება კომენტარები შესაძლებელი. ჩვენ ყოველთვის დეტალურად ვეცნობით და ვცდილობთ, რომ სამუშაო პროცესში გამოთქმული შენიშვნები გავითვალისწინოთ. ეს ქვეყნის იმიჯისთვის მნიშვნელოვანია, რომ მათ შენიშვნებს ყურადღება მიექცეს”, – განაცხადა თამარ ჩუგოშვილმა.
საერთაშორისო ორგანიზაცია Freedom House-მა გამოაქვეყნა მსოფლიოში თავისუფლების შესახებ 2018 წლის ანგარიში, რომელშიც საქართველო 100-დან 64 ქულით, კვლავ ნაწილობრივ თავისუფალ ქვეყნებს შორის მოხვდა.