"სარფის საბაჟოზე ნეიტრალურ ზონაში, მებაჟეებმა წამართვეს ტელეფონი და პირადობა, ფიზიკურად შეეხნენ ჩემს ოპერატორსაც და მეც", - ამის შესახებ აჭარის ტელევიზიის ჟურნალისტი ჯენი კვანტალიანი აცხადებს.
ჟურნალისტის განცხადებით, ისინი არსებული სიტუაციის გადაღებას ცდილობდნენ, რა დროსაც მათ თურქი მებაჟეები დაუპირისპირდნენ.
„ნეიტრალურ ზონაში ვიმყოფებოდით, გასასვლელში ატყდა ჩოჩქოლი, თურქ მებაჟეებს ეგონათ, რომ ხმაურიანი ადამიანების უკან ჩვენ ვიდექით, რის შემდეგაც აგრესიით წამოვიდნენ ჩვენსკენ. მე Facebook Live-ის ჩართვა მოვახერხე, მებაჟეებმა წამართვეს ტელეფონი და პირადობა, ფიზიკურად შეეხნენ ჩემს ოპერატორსაც და მეც, თუმცა ხალხის დახმარებით მოვახერხე ნივთებისა და საბუთების უკან დაბრუნება“, - ამბობს ჯენი კვანტალიანი.
შემთხვევის ადგილზე საზოგადოებრივი მაუწყებლის აჭარის ტელევიზიისა და რადიოს დირექტორი ნათია კაპანაძე იმყოფება და საქართველოს შინაგან საქმეთა სამინისტროს მიმართავს.
ნათია კაპანაძე უწყებას სამართლებრივი პროცედურების გატარებას და ფაქტით დაინტერესებას სთხოვს.
ადგილზე სახალხო დამცველის აპარატის წარმომადგენლებიც მივიდნენ. ამასთანავე, გამშვები პუნქტის თურქულ მონაკვეთზე, თურქეთის საკონსულოს წარმომადგენლები იმყოფებიან და მომხდარს სწავლობენ.
ფინანსთა სამინისტროს შემოსავლების სამსახურის საზოგადოებასთან ურთიერთობისა და მარკეტინგის დეპარტამენტის უფროსის, ხატია მოისწრაფიშვილის განცხადებით, დღეს პრობლემა შეექმნა იმ მოქალაქეებს, რომლებმაც საქართველოს საბაჟო გამშვები პუნქტი თურქეთის მიმართულებით გადაკვეთეს, ნეიტრალურ ზონაში სიგარეტი შეიძინეს და თურქეთში გადატანას შეეცადნენ.
„რიგებთან დაკავშირებით საზღვარზე შექმნილი პრობლემა ახალი ამბავი არ არის. თურქეთის მხარეს საბაჟო გამშვები პუნქტის მშენებლობა მიმდინარეობს. წინათ ექვსი გასასვლელი მუშაობდა, ახლა ერთი მუშაობს. ზაფხულის პერიოდია და მგზავრთა გადაადგილება დიდია, ასევე ტვირთბრუნვა და შესაბამისად, ეს მოცულობა გაზრდილ მოთხოვნებს ვერ უმკვლავდება. ეს არის ძირითადი პრობლემა. დღეს პრობლემა შეექმნა იმ მოქალაქეებს, რომლებმაც საქართველოს საბაჟო გამშვები პუნქტი თურქეთის მიმართულებით გადაკვეთეს და ნეიტრალურ ზონაში შეიძინეს სიგარეტი და თურქეთში გადატანას შეეცადნენ. საუბარია სიგარეტის დიდი რაოდენობით გადატანაზე, რის გამოც ინცინდენტი მოხდა. ძალიან ბევრს შეექმნა პრობლემა. ქართველი მებაჟეები თურქ კოლეგებთან ერთად ინტენსიურად მუშაობენ და პირველ რიგში მათ ვთხოვეთ ოფიციალური წერილით, თუ რატომ აჩერებენ მოქალაქეებს მიზეზი კონკრეტულად დაგვისაბუთონ. როდის დასრულდება თურქეთის მხარეს მშენებლობა, ინფორმაცია არ გავქვს. თურქეთი ამაზე ოფიციალურ პასუხს არ გვაძლევს, იმიტომ რომ არ იციან“,- აცხადებს მოისწრაფიშვილი.
