ისნის ბაზრობაზე გაჩენილი ხანძრის შედეგად დამწვარი სავაჭრო ობიექტები დაზღვეული არ იყო, ამის შესახებ ერთ-ერთი ობიექტის მესაკუთრე ემზარ ლეთოდიანმა განაცხადა.
მისი თქმით, რადგან ბაზრობაზე იყიდება ე.წ. მეორადი ავტომობილების ნაწილები, არც ერთი სადაზღვევო კომპანიის ინტერესში არ შედის მათი დაზღვევა.
მისი თქმით, მათ ბაზრობის ადმინისტრაციის მიმართ პრეტენზიები აქვთ.
“ბაზრობის ადმინისტრაცია გვეუბნება, რომ მაღაზიები იყო თქვენს მფლობელობაში და თქვენ თვითონ მიხედეთო. ჩვენ ვართ დაზარალებულები. გუშინ ღამე ვნახე, რომ ჩემი მაღაზია მთლიანადაა დამწვარი, ჭერი ჩამონგრეულია. შემდეგ სამართალდამცველებმა ტერიტორია დაგვატოვებინეს. დღეს კი ადგილზე შესვლის საშუალება არ გვეძლევა”, - განაცხადა ემზარ ლეთოდიანმა.
ცნობისთვის, ისნის ბაზრობაზე 1 200 კვადრატული მეტრის ფართობი დაიწვა.