„გიორგი ამ თემით გადაცემა „პრაიმშოუში“ იყო, როგორც ერთ-ერთი პირი, რომელმაც ეს თამაში ითამაშა. თუმცა, მისგან ვიცოდი, რომ „ლურჯი ვეშაპი“ არასდროს უთამაშია“, - განუცხადა „ჯი-ეიჩ-ენ-ს“ გიორგი ხაჭაპურიძის მეგობარმა, გიგა გელხვიიძემ.
მას ახალგაზრდების ნარკოტიკული ინტოკსიკაციით გარდაცვალების ვერსიის არ სჯერა. გელხვიიძეს მკვლელობის გარშემო კითხვები სხვადასხვა გარემოებამ გაუჩინა.
„გიორგის კარგად ვიცნობდი, ამიტომ თამამად შემიძლია ვთქვა, რომ ის ნარკოტიკს არ მოიხმარდა. შესაბამისად, ის ვერსია, რომ ისინი „ბიოს“ გადაჭარბებული დოზით დაიღუპნენ, მართებულად არ მიმაჩნია. მკველოლობის ვერსიასთან დაკავშირებით ჩემი მოსაზრება მაქვს, თუმცა, დასააბუთებულად რამის თქმა გამიჭირდება. კითხვებს ბადებს ის ფაქტი, თუ როგორ მოახერხა ბინის მეპატრონემ თავის გასაღებით კარის გარედან გაღება, თუ ის, შიგნიდან იყო ჩაკეტილი? როცა კარი შიგნიდანაა ჩაკეტილი, გარედან მისი გაღება შეუძლებელია.
საეჭვო გარემოებას ქმნის ასევე მაგიდაზე ჭიქების რაოდენობა. კიდევ ერთი ფაქტი, გაუსაძლისი სიცხის მიუხედავად, სახლში ფანჯრები დაკეტილი იყო, მაგრამ კონდიციონერი ჩართული არ ყოფილა. საეჭვოა ისიც, ორივე ერთად ისე როგორ გარდაიცვალა, რომ ვერცერთმა სასწრაფო დახმარების ბრიგადის გამოძახება, ან რამე სახის რეაგირება ვერ მოახერხა?“, - აცხადებს გელხვიიძე.
კითხვაზე, შესაძლებელია თუ არა ეს სექსუალურ ნიადაგზე სიძულვილით მოტივირებული დანაშაული იყოს, მას პასუხის გაცემა უჭირს.
„სხვის პირად ცხოვრებაზე ვერ ვისაუბრებ, თუმცა, საქართველოში განსხვავებული სექსუალური ორიენტაციის მატარებელი ადამიანები იდევნებიან, ეს სიახლე არ არის“, - აღნიშნავს ხაჭაპურიძის მეგობარი.