შინაგან საქმეთა მინისტრის მოადგილის, შალვა ხუციშვილის განცხადებით, ქულათა სისტემის ამოქმედების შემდეგ, უსაფრთხოების მონაცემების კუთხით, დადებითი შედეგია.
მისივე თქმით, დეტალური სტატისტიკა თვის ბოლოს გასაჯაროვდება.
"ყოველდღიურად ჩვენ ვაჯამებთ ამ სტატისტიკურ მონაცემებს. თუ გავითვალისწინებთ იმ გარემოებას, რომ ქულათა სისტემის ამოქმედების შემდეგ ადმინისტრირება გარკვეულად გამკაცრდა, იმ პრობლემურ დარღვევებზე, რომელიც ხშირ შემთხვევაში ავარიების წყარო იყო, მაგალითად, ტელეფონზე საუბარი, არის ასეულობით სამართალდარღვევის კლება დღის განმავლობაში. თუმცა ეს სტატისტიკა გამოქვეყნდება თვის ბოლოს და დეტალურად ნახავს საზოგადოება პირველად შედეგებს. შემიძლია გითხრათ, რომ უსაფრთხოების მონაცემების კუთხით დადებითი შედეგები გვაქვს",- განაცხადა ხუციშვილმა.