აზერბაიჯანის გენერალური პროკურორის მოადგილე კამრან ალიევი აფგან მუხთარლის საქმის კომენტირებისას აცხადებს, რომ აზერბაიჯანი დამოუკიდებელი სახელმწიფოა და გამოძიებას აწარმოებს საკუთარი და არა ევროპარლამენტის კანონმდებლობის შესაბამისად. კამრან ალიევი საქართველოში საერთაშორისო კონფერენციაზე დასასწრებად იმყოფება.
"ის დააკავეს, როცა უკანონოდ კვეთდა საზღვარს. ამ ფაქტზე მიმდინარეობდა გამოძიება. არის თუ არა კომუნიკაცია ქართულ მხარესთან? მე არ ვაწარმოებ გამოძიებას და არ შემიძლია ამ კითხვას ვუპასუხო. თუ საჭიროება იქნება, რა თქმა უნდა, ვითანამშრომლებთ, რადგან ის კვეთდა საზღვარს ქართული მხრიდან აზერბაიჯანში, შეიძლება გარკვეული კითხვები გაჩნდეს გამოძიების მსვლელობაში. კონფიდენციალური გამოძიებაა და მეტის თქმა არ შემიძლია",- განაცხადა ალიევმა.
რაც შეეხება იმ ინფორმაციას, რომ აზერბაიჯანელი ჟურნალისტი სინამდვილეში თბილისში დააკავეს, ალიევი აცხადებს, რომ ინფორმაცია ყველანაირი შეიძლება იყოს, რამდენად შეესაბამება სიმართლეს, გამოძიების საკითხია. მისივე თქმით, თუ მუხთარლის ჯანმრთელობას საფრთხე დაემუქრება მას სამედიცინო დახმარენბას აღმოუჩენენ.
,,თუ რამე იქნება მის ჯანმრთელობის მდგომარეობაზე, თქვენ არ ინერვიულოთ, იქ არის კვალიფიციური სამედიცინო სამსახური და დახმარებას აღმოუჩენს. მე არ ვიცი, რა ინფორმაციაზე დაყრდნობით საუბრობს ევროპარლამენტი, რომ მას ჯანმრთელობის პრობლემები აქვს, მათი საქმეა, მაგრამ აზერბაიჯანი დამოუკიდებელი სახელმწიფოა და გამოძიებას აწარმოებს საკუთარი კანონმდებლობის შესაბამისად და არა ევროპარლამენტის. ამ სტრუქტურის წევრი არაა არც აზერბაიჯანი და არც საქართველო",- განაცხადა ალიევმა.