„მგონია, რომ სიტყვა წასცდა ან იფიქრა, რომ თავისი განცხადებით რაღაც ურთიერთობას მოაგვარებს“,- განაცხადა პარლამენტის ვიცე-სპიკერმა გია ვოლსკიმ გერმანელი დიპლომატის მიერ გაკეთებული განცხადების შესახებ. მისი აზრით, ჰერბერტ ზალბერს შემთხვევით წამოცდა სიტყვა.
„მგონია, რომ სიტყვა წასცდა ან იფიქრა, რომ თავისი განცხადებით რაღაც ურთიერთობას მოაგვარებს და ჟენევაში ამ პროცესის განვითარებას ხელს შეუწყობს, რაც სიღრმისეული შეცდომაა. არ მინდა, ეს საკითხი ან მისი ეს გადაცდომა საქართველოსთან მიმართებაში ევროკავშირის პოლიტიკას დავუკავშირო, რადგან არასწორი ვიქნები. მაგრამ ამ პიროვნებამ განცხადება თავად უნდა გააკეთოს. ეს არც არაფერს უწყობს ხელს და საქართველოს მიმართ კიდევ არაკორექტულ დიპლომატიურ ნაბიჯს დგამს. ეს ევროკავშირის პოლიტიკასთან დაკავშირებული არ არის, რომლის შესახებაც ძალიან კარგად ვიცით“,- განაცხადა გია ვოლსკიმ.
საქმე ეხება გერმანელი დიპლომატის განცხადებას, რომ იგი ანატოლი ბიბილოვს ულოცავს ოკუპირებული ცხინვალის რეგიონში ე.წ. არჩევნების წარმატებულად ჩატარებას. ამ ფაქტის შესახებ საქართველოს საგარეო საქმეთა სამინისტრომ ევროკავშირის ელჩი და გერმანელი დიპლომატი საკითხის შესწავლისათვის უწყებაში დაიბარა.
