„ჩემი შვილი დააკავა ზუსტად იმ დაწესებულებამ, რომელზეც 2 კვირის წინ დავწერე ძალიან კრიტიკული მასალა,“- განაცხადა გაზეთ „ქრონიკა+“-ის რედაქტორმა, ელისო კილაძემ „განსხვავებული აქცენტების“ ეთერში საუბრისას. შვილის დაკავების ფაქტს იგი მის ჟურნალისტურ საქმიანობასა და მთავრობასთან დაპირისპირებას უკავშირებს. ასევე იგი მის შვილს ბიძინა ივანიშვილის პატიმრად მიიჩნევს.
„ჩემთან იყო მუქარები შვილის დაკავებაზე. ორი კვირის განმავლობაში ამ ფაქტამდე, მისი საყვარელი დეიდაშვილის, უჩა მამაცაშვილის მეშვეობით, შუამავალი დადიოდა ჩემთან, რომელიც მთხოვდა გარიგებას. გარიგების შინაარსი იყო ის, რომ, პირველი, „რუსთავი 2“-ის საქმიდან გვერდზე დავმდგარიყავი და, მეორე, შემეცვალა ტონი და მთლიანად ვყოფილიყავი „ქართული ოცნების“ განკარგულებაში,“ - განაცხადა ელისო კილაძემ.
ჟურნალისტი გამოძიებას მტკიცებულებების გამოქვეყნებასაც თხოვს და აცხადებს, რომ მის შვილს დაკავებისას ნარკოტიკული ნივთიერებები ჩაუდეს.
