ეკონომიკის საკითხებში ექპერტის დემურ გიორხელიძის შეფასებით, ფინანსური ზედამხედველობის სააგენტოს შექმნა ერთ-ერთი წინაპირობაა იმისა, რომ სექტემბერ-ოქტომბერში ლარის გაუფასურებაზე ხელშემწყობი სპეკულაციები არ მოხდება.
მან ”ჯი-ეიჩ-ენთან” საუბარში ასევე აღნიშნა, რომ ”ეროვნულ ბანკთან” მიმართებაში გატარებული ცვლილებები ინვესტიების შეფერხებას არ გამოიწვევს.
”ფინანსური ზედამხედველობის სააგენტოს შექმნა არ არის ბანკების ზედამხედველობა მხოლოდ, იგი ერთადერთი ორგანო იქნება, რომელიც მთლიანობაში ქვეყნის საფინანსო სისტემას გააკონტროლებს. ამიტომ, გააჩნია როგორ განხორციელდება ეს ზედამხედველობა. ის, რომ ”ეროვნულ ბანკის” შესახებ კანონპროექტში ცვლილების შეტანა ბიზნესს დააზარალებს და ინვესტიციის შემოდინებას შეუშლის ხელს, სისულელეა. ამ სააგენტოს შექმნას ინვესტიციების შემოსვლა არ შემოსვლასთან, საერთოდ არ აქვს კავშირი. საფინანსო ზედამხედველობა გამოყოფილი იქნება ეროვნული ბანკიდან, რამაც შესაძლოა შეამციროს სექტემბერ-ოქტომბერში ხელშემწყობი სპეკულაციური ზეწოლა ლარზე, მაგრამ ეს არის ერთი და არა ერთადერთი განმსაზღვრელი ფაქტორი, რაც ჩვენს ეროვნულ ვალუტას უდევს არასტაბილურობის საფუძვლად”, _ აცხადებს დემურ გიორხელიძე.
შეგახსენებთ, რომ ხვალ, პარლამენტის საშემოდგომა სესია გაიხსნება. 2 სექტემბერს კი, პლენარული სხდომის ჩატარება იგეგემება. ერთ- ერთი მთავარი საკითხი, რაც საშემოდგომო სესიის დასაწყისში მსჯელობის თემა იქნება ”ეროვნული ბანკის” შესახებ კანონპროექტზე პრეზიდენტის მიერ გამოყენებული ვეტო და მის მიერ პარლამენტისთვის შეთავაზებული ე.წ მოტივირებული შენიშვნებია.