აზერბაიჯანულ ბიზნესს საქართველოში სამთავრობო ცვლილება არ აშინებს, რადგანაც ირაკლი ღარიბაშვილი მათ პროექტებს ადრეც მხარს უჭერდა.
„SOCAR-ს საქართველოს პრემიერ-მინისტრის ცვლილება არ აშინებს:ღარიბაშვილი კომპანიის პროექტებს ადრეც მხარს უჭერდა"- აზეთი სათაურით აქვეყნებს დღეს ინფორმაციას აზერბაიჯანული საინფორმაციო პორტალი - ABC.
როგორც გამოცემა, აზერბაიჯანის სახელმწიფო ნავთობკომპანიის (SOCAR) ხელმძღვანელზე დაყრდნობით განმარტავს, საქართველოს ეკონომიკის მთავარ ინვესტორს, სამთავრობო ცვლილებები არ აშინებს.
SOCAR-ის პრეზიდენტის როვნაგ აბდულაევის განმარტებით, პრემიერ-მინისტრობის კანდიდატი, რომელიც აქამდე შს მინისტრის პოსტზე მუშაობდა, SOCAR -ის პროექტებს საქართველოში მხარს უჭერდა.
„მე დარწმუნებული ვარ, რომ ეს მხარდაჭერა კვლავ გაგრძელდება და მეზობელ სახელმწიფოში მთავრობის მეთაურის ცვლილება, ჩვენს ურთიერთობებზე გავლენას არ იქონიებს"- განმარტა აბდულაევმა.
შეგახსენებთ, რომ 17 ნოემბერს დაგეგმილია ახლადარჩეული პრეზიდენტის გიორგი მარგველაშვილის ინაუგურაცია და სწორედ ამის შემდეგ საქართველოს საკანონმდებლო ორგანო დაამტკიცებს ახალ პრემიერ-მინისტრს და მთავრობის შემადგენლობას.
