უკრაინის პრეზიდენტმა ვოლოდიმირ ზელენსკიმ განაცხადა, რომ ბრიტანეთის პრემიერ-მინისტრ ენდი ბერნემთან შეხვედრისას უკრაინისთვის საჰაერო თავდაცვის საშუალებების დაჩქარებული მიწოდების შესახებ შეთანხმდნენ.
მისი თქმით, ეს საშუალებები უკრაინის წინააღმდეგ რუსეთის მიერ გამოყენებული რეაქტიული „შაჰედების“ გასანეიტრალებლად იქნება განკუთვნილი.
„ახლა განსაკუთრებით მნიშვნელოვანია ცის დაცვის გაძლიერება და უკრაინისთვის ყველაფრის უზრუნველყოფა, რაც სიცოცხლის დასაცავად არის საჭირო. დღეს მიღებულია გადაწყვეტილება, რომ უკრაინას რეაქტიული „შაჰედების“ წინააღმდეგ საბრძოლველად ბრიტანული საჰაერო თავდაცვის საშუალებები დაჩქარებული წესით მიეწოდოს“, - დაწერა ზელენსკიმ Telegram-ზე.
თავის მხრივ, ბრიტანეთის პრემიერ-მინისტრმა ზელენსკისთან შეხვედრის დასაწყისში დაარწმუნა, რომ უკრაინის მხარდაჭერის საკითხში ლონდონის პოზიცია არ შეიცვლებოდა. მანამდე ბერნემმა პირობა დადო, რომ უკრაინის პრეზიდენტი ლონდონს „ხელცარიელი“ არ დატოვებდა.
ვიზიტამდე უკრაინის პრეზიდენტმა განაცხადა, რომ ბერნემთან სადაზვერვო ინფორმაციის გაცვლისა და Starlink-ზე წვდომის საკითხებს განიხილავდა.
