2 ნოემბერს, 20.00 საათზე, თბილისში "ისრაელის სახლი" (მისამართი: რუსთაველის გამზირი #22. III სართ.) იხსნება. ღონისძიებას ისრაელის საგარეო საქმეთა მინისტრის მოადგილე ზეევ ელკინი და სხვა ოფიციალური პირები დაესწრებიან.
როგორც „ჯი-ეიჩ-ენს" ორგანიოზატრებმა აცნობეს, "ისრაელის სახლი" _ ეს არის ისრაელის მთავრობის მონაწილეობით შექმნილი საპილოტე პროგრამა, რომლის მიზანია ებრაულ დიასპორებთან უფრო ეფექტიანი მუშაობა და მეგობარ ქვეყნებთან ურთიერთობის უფრო მაღალ საფეხურზე გადაყვანა.
საპილოტე პროგრამის ფარგლებში პირველი ცენტრი სწორედ საქართველოში იხსნება.
საზოგადოებრივი ცენტრის მიზნებია:
_ დიასპორისა და ქართული საზოგადოებისათვის ისრაელის გაცნობა და სოლიდარობა მის მიმართ;
_ დიასპორაში ებრაული ცნობიერების და ეროვნული მუხტის გაღვივება;
_ საქართველო-ისრაელის ურთიერთობის შესახებ თანამედროვე ხედვის ჩამოყალიბება და
მოტივაციის შექმნა ამ ურთიერთობის სამომავლო განვითარებისთვის;
აღნიშნული მიზნების განხორციელებისთვის "ისრაელის სახლში" რეგულარულად ჩატარდება სალექციო კურსი ისრაელის და მისი საერთაშორისო როლის შესახებ; მოეწყობა სემინარები სხვადასხვა სფეროში ისრაელის მიღწევების გასაცნობად - კულტურა, ეკონომიკა, ბიზნესი, მედიცინა, ახალი ტექნოლოგიები, პოლიტიკური ცხოვრება და ა.შ. ჩატარდება კულტურულ-საგანმანათლებლო ღონისძიებები - შეხვედრები, გამოფენები, პრეზენტაციები.
განსაკუთრებული ადგილი დაეთმობა ეკონომიკურ და ბიზნესკავშირებს საქართველოსა და ისრაელს შორის; მოეწყობა შეხვედრები და კონფერენციები, სადაც ორი ქვეყნის ბიზნესის წარმომადგენლებს შეეძლებათ დაამყარონ უშუალო კავშირი და დაიწყონ პირდაპირი თანამშრომლობა.
პროექტში ისრაელის მთავრობის აქტიურ ჩართულობაზე მიუთითებს ის ფაქტი, რომ "ისრაელის სახლის" გახსნას დაესწრება ისრაელის საგარეო საქმეთა მინისტრის მოადგილე და ქვეყნის სხვა ოფიციალური პირები, ასევე საქართველოს მთავრობისა და დიპლომატიური კორპუსის წარმომადგენლები. დაგეგმილია საქმიანი შეხვედრები, "ისრაელის სახლის" ოფიციალური გახსნა და მსხვილი საინვესტიციო პროექტების, მათ შორის სასტუმრო "რიქსოსის" დათვალიერება.
გახსნას დაესწრება ასევე ლიდერთა და ფილანტროპთა საერთაშორისო კომიტეტის _ "ემ ელ სი"-ს წარმომადგენლობა. ისინი შეისწავლიან საქართველოსთან ეკონომიკური თანამშრომლობის პოტენციალს და დაიგეგმება ბიზნეს ფორუმის ჩატარება.
ღონისძიების ორგანიზატორები არიან საქართველო-ისრაელის ბიზნეს პალატა და "აი. ელ. სი".
საქართველო-ისრაელის ბიზნეს პალატის პრეზიდენტისა და "აი ელ სი"-ის კოორდინატორის კავკასიაში, იციკ მოშეს თქმით, "ისრაელის სახლი" არის ქვეყნებს შორის თანამშრომლობის ახალი ხედვა, რომელიც გახდება იმპულსის მიმცემი ურთიერთობათა გაღრმავების საქმეში. "ისრაელის სახლი" გახდება ის ადგილი, სადაც ადამიანები ეზიარებიან ნამდვილ ისრაელს, მოისმენენ იმ წარმატებებისა და პოტენციალის შესახებ, რითაც მან ბოლო ათწლეულებში მსოფლიო გააოცა. ეს იქნება ადგილი, სადაც ებრაული დიასპორისა თუ ზოგადად, ქართული საზოგადოების წარმომადგენლები შეხვდებიან ცნობილ ისრაელელ მოღვაწეებს, მოისმენენ მათ ლექციებს თითქმის ყველა სფეროში. ეს პროექტი უპრეცედენტოა და მომავალ ურთიერთობებში ის ახალი სიტყვა იქნება.
