დღეს, საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი დავით დარახველიძე და საქართველოს კულტურისა და ძეგლთა დაცვის მინისტრი გურამ ოდიშარია წეროვანში, დევნილ მოსწავლეებსა და მასწავლებლებს შეხვდნენ. 2008 წლის აგვისტოს მოვლენების შედეგად საქართველოს მასშტაბით კომპაქტურად ჩასახლებულ პუნქტებში გახსნილმა 12-მა სახელოვნებო სკოლამ შეწყვიტა ფუნქციონირება. დღეს, ეს პროექტი აღდგა და შედეგად, 71 დევნილი პედაგოგი განაახლებს მუშაობას, 1000-მდე ბავშვი კი უფასოდ დაეუფლება ხელოვნების დარგებს.
გურამ ოდიშარიას განცხადებით 12 სახელოვნებო სკოლა მომავალ წელსაც დაფინანსდება. გარდა ამისა, წეროვანში მოეწყობა კინოთეატრი, რომელიც ხელს შეუწყობს დასახლებაში კულტურული ცხოვრების განვითარებას.
დავით დარახველიძემ ღონისძიებაზე აღნიშნა, რომ ბავშვები და პედაგოგები მხნედ და იმედიანად შეჰყურებენ მომავალს და ყველანი, ახალ ხელისუფლებასთან ერთად, სწორი პოლიტიკით, უახლოეს მომავალში დაუბრუნდებიან მშობლიურ მიწა-წყალს.
მინისტრებმა მოსწავლეებსა და მასწავლებლებს პროეტის განახლება მიულოცეს. კულტურისა და ძეგლთა დაცვის სამინისტრო წეროვანის ახალგაზრდულ ცენტრს საჩუქრად კინოთეატრის აპარატურას გადასცემს.
მასალის გამოყენების პირობები