ისრაელის ქნესეთის წევრი და იმავდროულად, ისრაელი-საქართველოს მეგობრობის ჯგუფის წევრი ავრაამ მიხაელის განმარტებით, წლების უკან თავად საქართველოში იყო წინააღმდეგობა, რათა ორ ქვეყანას შორის სავიზო რეჟიმი გაუქმებულიყო. რასაც ქნესეთის დეპუტატი ისრაელში არალეგალთა პრობლემას და სამუშაო ადგილების სიმცირესაც უკავშირებს. ავრამ მიხაელის განმარტებით, ბოლო 3 წლის განმავლობაში ისრაელში 1 მლნ აფრიკელი არალეგალი ჩავიდა, რამაც ქვეყანას პრობლემები შეუქმნა და ხელისუფლებაც იძულებული იყო კანონმდებლობა გაემკაცრებინა.
"საქართველოში რთული მდგომარეობაა სამუშაოს კუთხით. ჩვენც, ისრაელში არ გვაქვს იმის საშუალება, რომ ხალხი მასობრივად მივიღოთ. ვიზების გაუქმების შემდეგ შესაძლოა, საქართველოდან ჩასულმა ხალხმა ისრაელში არაკანონიერი მუშაობა დაიწყოს. ჩვენ ისრაელში ძალიან დიდი პრობლემა გვაქვს აფრიკიდან შემოსული ხალხის"- განმარტა ავრაამ მიხაელმა.
