კომპანია „ქროსერვისმა" 1 ლარად ნაყიდი ქონება სახელმწიფოს უკან დაუბრუნა. „ქროსერვისში" „ჯი-ეიჩ-ენს" განუმარტეს, რომ აღნიშნულ პროექტში მონაწილეობა კომპანიისთვის მომგებიანი არ იყო და სწორედ ამიტომ თქვა ინვესტორმა უარი წყალტუბოში სასტუმროს მშენებლობაზე
როგორც სააგენტო „ჯი-ეიჩ-ენს" ეკონომიკისა და მდგრადი განვითარების სამინისტროში განუცხადეს, სახელმწიფოსა და „ქროსერვისს" შორის ხელშეკრულება 2012 წლის 24 იანვარს გაფორმდა და კომპანიამ წყალტუბოში რუსთაველის ქუჩა #13-ში მდებარე არასასოფლო-სამეურნეო მიწის ნაკვეთი და მასზე დამაგრებული შენობა შეიძინა, რაშიც სიმბოლური თანხა, 1 ლარი გადაიხადა. სახელშეკრულებო ვალდებულების მიხედვით, კომპანიას 2013 წლის 31 მაისამდე გადაცემულ ქონებაზე თანამედროვე ტიპის, მაღალი კლასის სასტუმრო უნდა აეშენებინა და ექსპლუატაციაში შეეყვანა, რისთვისაც მინიმუმ 3 მლნ ლარის ინვესტიცია უნდა განეხორციელებინა.
შეგახსენებთ, რომ წყალტუბოში აღნიშნულის პროექტის შეჩერების შესახებ განცხადება რამდენიმე დღის უკან „ნაციონალური მოძრაობის" ერთ-ერთმა ლიდერმა გიორგი ვაშაძემ გააკეთა.