"შინაგან საქმეთა მინისტრის ბრძანებას და პრეზიდენტის ინიციატივას შორის არანაირი კავშირი არ არსებობს,"- ამის შესახებ საქართველოს პრეზიდენტის ადმინისტრაციის ხელმძღვანელმა ანდრო ბარნოვმა დღეს გამართულ საგანგებო ბრიფინგზე ისაუბრა.
ბარნოვის თქმით, "ნურავის ჰქონია, რომ ნასამართლეობა შინაგან საქმეთა მინისტრის ბრძანებით ვინმეს მოეხსნა, ეს პრეზიდენტის პრეროგატივაა".
ამასთან, ანდრო ბარნოვი შინაგან საქმეთა სამინისტროს საზოგადოების შეცდომაში შეყვანისგან თავის შეკავებისკენ და იაფფასიანი პოპულიზმისგან თავის არიდებისკენ მოუწოდებს.
"ის ბრძანება, რომლზეც იქ იყო საუბარი, უკავშირდება იმას, რომ თვითონ სამსახურის შიგნით, სამინისტროს შიგნით იყო გარკვეულობა იმის შესახებ, თუ როგორ გამოეყენებინათ ამნისტიის კანონი და მინისტრმა სამწუხაროდ, 8 თვის დაგვიანებით მაგრამ როგორც იქნა და როგორც ჩანს, რაღაც ინსტრუქცია შეიმუშავა, რომელზეც თანამშრომლებს აცნობა. რა თქმა უნდა, ეს არანაირად პრეზიდენტის ინიციატივას არ უკავშირდება, იმიტომ, რომ პრეზიდენტის ინიციატივა გულისხმობს არა რომელიმე ამნისტიით შეწყალებულ პირებს, არამედ ნებისმიერ სასჯელმოხდილ პირს, რომელმაც ოდესმე მსჯავრი, სასჯელი მოიხადა და აქვს ნასამართლეობა, - განაცხადა ანდრო ბარნოვმა.
შეგახსენებთ, რომ შინაგან საქმეთა სამინისტროს ცნობით, მიმდინარე წლის 16 აგვისტოს შს მინისტრ ირაკლი ღარიბაშვილის 644-ე ბრძანების თანახმად, დადგენილია ახალი რეგულაცია, რომელიც სისხლის სამართლებრივი პასუხისმგებლობისა და სასჯელისგან სრულად გათავისუფლებულ პირთა მიმართ ნასამართლეობის მოხსნას გულისხმობს.