ბაქრაძის თქმით, "ხვალინდელ შეხვედრაზე ქვეყნის ეკონომიკაში მიმდინარე პრობლემური საკითხების გარდა მსკჯელობა წინა წლებში არსებულ იმ პრობლემებსა და შეცდომებზეც გაიმართებოდა, რომლებიც დღევანდელი გადასახედიდან უკეთ ჩანს".

"ვწუხვარ, რომ პირადი წყენის და გაბუტვის საბაბით, დღეს ეკონომიკის მინისტრმა საქმიან შეხვედრაზე უარი თქვა, რომლის ამოცანა იყო ის, რომ ამ ქვეყანაში ასეულობით ათას ოჯახს უკეთესად ეცხოვრა. მე მას ეს შეხვედრა შევთავაზე არა იმიტომ, რომ მიხარია ან მსიამოვნებს ბატონი კვირიკაშვილის ნახვა, არამედ იმიტომ რომ დღეს ჩვენს ქვეყანაში ადამიანებს პრობლემები აწუხებთ და ამ პრობლემების მოგვარებაა საჭირო. ამიტომ მისგან განსხვავებით მე შეხვედრას ვხედავდი, როგორც საქმიანს, სადაც გულწრფელად ვისაუბრებდით როგორც იმ პოზიტიურზე, რაც წინა წლებში იყო და შევახსენებ, რომ დღევანდელისგან განსხვავებით, მაშინ ეკონომიკის 7-8%-იანი ზრდა იყო, ასევე ვისაუბრებდით იმ პრობლემებსა და შეცდომებზე, რომლებიც წინა წლებში დღევანდელი გადასახედიდან ჩანს. ამიტომ, ჩემი შეთავაზება მის მიმართ აბსოლუტურად საქმიანი იყო და ორიენტირებული იყო ეკონომიკის განვითარებასა და ადამიანების უკეთ ცხოვრებაზე, იმიტომ რომ განსხვავებით ბატონი კვირიკაშვილისა, მე ყოველ დღე დავდივარ საქართველოს რეგიონებში და ადამიანებს ვხვდები. მე ვხედავ, რომ დღეს ადამიანების დიდი ნაწილი ერთი წლის წინანდელ პერიოდთან შედარებით ცხოვრობს ან ისევ ისე, ან უფრო უარესად. მე მაწუხებას ამ ადამიანების ბედი და მსურს, რომ მათ უკეთესად იცხოვრონ და საქართველოს ეკონომიკა წინ წავიდეს. ამიტომ, ძალიან ვწუხვარ, რომ ეს აბსოლუტურად საქმიანი, არაპოლიტიკური, კონკრეტული წინადადებების განსახილველი შეთავაზება ბატონი კვრიკაშვილისთვის მიუღებელი აღმოჩნდა", - განაცხადა დავით ბაქრაძემ.

შეგახსენებთ, რომ საპარლამენტო უმცირესობის ლიდერის, "ნაციონალური მოძრაობის" საპრეზიდენტო კანდიდატ დავით ბაქრაძის და საქართველოს ეკონომიკისა და მდგრადი განვითარების მინისტრ გიორგი კვირიკაშვილის შეხვედრა აღარ გაიმართება.

ამის შესახებ კვირიკაშვილმა საგანგებო პრესკონფერენციაზე განაცხადა და განმარტა, რომ მსგავსი გადაწყვეტილების მიღება "ნაციონალური მოძრაობის" მხრიდან გაჟრერებულმა განცხადებებმა გამოიწვია.

"ცოტა ხნის წინ მე თანხმობა განვაცხადე დავით ბაქრაძესთან შეხვედრაზე, ქვეყნის მიმდინარე ეკონომიკურ საკითხებზე საუბრის მიზნით. სიტყვიერი შეთანხმებაც მქონდა, რომ ეს შეხვედრა უნდა შემდგარიყო ოთხშაბათს ან ხუთშაბათს. დღეს შევთანხმდით, რომ შეხვედრა შედგებოდა ხვალ, 13:00 საათზე. ამის შემდეგ, "ნაციონალური მოძრაობის" ერთ-ერთმა ლიდერმა გიორგი ვაშაძემ გააკეთა სატელევიზო განცხადება, სადაც კიდევ ერთხელ დახატა ქვეყანაში აპოკალიფტური სურათი და გამოთქვა "წუხილი", რომ თურმე, ეკონომიკის მინისტრი ვერ იცლის იმისთვის, რომ "ნაციონალური მოძრაობისგან" მიიღოს რჩევები. ახლა მინდა, გაასაგებად განვაცხადო: მიუხედავად იმისა, რომ დავით ბაქრაძე გახლავთ პარლამენტის ყოფილი თავმჯდომარე და "ნაციონალური მოძრაობის" ერთ-ერთ ლიდერი, ლიდერი იმ პოლიტიკური ძალისა, რომლის ხელმძღვანელობითაც წლების განმავლობაში ხდებოდა ქვეყნის ეკონომიკის არასწორი მიმართულებით წაყვანა, ბიზნესმენების ტერორი, კანონიერი ქონების წართმევა, ასევე თავმჯდომარე იმ პარლამენტისა, რომელმაც ერთსულოვნად დაუჭირა მხარი სპეციალურად შექმნილ კანონს ერთი კონკრეტული ბანკის განადგურების თაობაზე, იმ ბანკის, რომელშიც მე წლების განმავლობაში გენერალურ დირექტორად ვმუშაობდი, ლიდერი იმ ძალისა, რომელიც გაზრდილი საგარეო ვალის ხარჯზე ქმნიდა ეკონომიკის აღმავლობის არარეალურ ილუზიას და ახლა გაუჩნდათ სურვილი გვასწავლონ, რა ეკონომიკური პოლიტიკით უნდა განვითარდეს ქვეყანა, იმ ფონზე, როდესაც ჩვენი მთავრობა ყველაფერს აკეთებს იმისთვის, რომ გაუმკლავდეს ამ უმძიმეს მემკვიდრეობას და ხელი შეუწყოს ქვეყანაში რეალურად თავისუფალი ბიზნესის განვითარებას, მე მაინც ჩავთვალე, რომ ვინაიდან მე ვარ ქვეყნის ეკონომიკის მინისტრი, არავითარ შემთხვევაში უარი არ უნდა მეთქვა ამ შეხვედრაზე, თუმცა ისიც უნდა აღვნიშნო, რომ რეალურად ვაცნობიერებდი, რომ ამ შეხვედრის დადებითი შედეგის ალბათობა ნულის ტოლი იყო. ვაშაძის განცხადებამ კიდევ ერთხელ დამარწმუნა, რომ "ნაციონალური მოძრაობის" მხრიდან ეს შეხვედრა განიხილებოდა, როგორც მხოლოდ და მხოლოდ წინასაარჩევნო პიარის ნაწილი და არა რეალური სურვილი დიალოგისა. ყოველივე ზემოთქმულიდან გამომდინარე, მე ვაუქმებ დათქმულ შეხვედრას და ამაზე მთელ პასუხისმგებლობას ვაკისრებ დავით ბაქრაძეს და "ნაციონალურ მოძრაობს", - განაცხადა გიორგი კვირიკაშვილმა.