"ყველამ, ვისაც საღი აზრი და მინიმალური პატიოსნება აქვს, იცის, რომ საქართველო რუსული აგრესიის მსხვერპლი იყო,"- აის შესახებ საქართველოს ეროვნული უშიშროების საბჭოს მდივანმა გიგა ბოკერიამ 2008 წლის რუსეთ-საქართველოს ომის ხელახალი გამოძიების საკითხის კომენტირებისას ისაუბრა.
მისი თქმით, "ამჟამად ახალი ხელისუფლების ზოგიერთი მაღალი თანამდებობის მქონე პოლიტიკური პირის მხრიდან რუსული აგრესიის წინა ხელისუფლებაზე, სააკაშვილზე და საბოლოო ჯამში, ამის გამო საქართველოზე გადაბრალების მომსწრეები ვართ".
"ჩემი აზრით, აბსოლუტურად ბრიყვული, უპასუხისმგებლო, უზნეო და სამარცხვინო კამპანიის მომსწრეები ვართ. მე არ ვიცი, შეიძლება კალკულაცია აქ ის არის, რომ ეს რაღაცნაირად ხელს შეუწყობს რაიმე ქვეყნის წინაშე მდგომი ამოცანების გადაწყვეტას ან იმ დიალოგს, რომელიც რუსეთის ფედერაციასთან მიმდინარეობს და რაც თავისთავად ნორმალურია, ეს ყოველ შემთხვევაში უპასუხისმგებლობა და სიბრიყვეა. ყველამ, ვისაც საღი აზრი და მინიმალური პატიოსნება აქვს, იცის, რომ საქართველო რუსული აგრესიის მსხვერპლი იყო. რაც შეეხება მაშინდელი ხელისუფლების რომელიმე სტრუქტურების მიერ სამხედრო თვალსაზრისით და რაიმე სხვა თვალსაზრისით როგორ იქნა ამოცანები შესრულებული ამის შესწავლას, ეს თავისთავად ნორმალური რამ არის. თავის დროზე ამას საპარლამენტო კომისია მიეძღვნა, რომელმაც მრავალი დღის და საათის განმავლობაში ყველა საკვანძო თანამდებობის პირი დაკითხა. თვითონ სამხედრო თვალსაზრისით, ამ საკითხების შესწავლა ჩვენს საერთაშორისო პარტნიორებთან ერთად, იყო თავდაცვის სამინისტროს ამოცანა. რამდენადაც ჩემთვის ცნობილია, ასეთი ანალიზი ჩატარებულია და ეს ანალიზი შეიძლება გაგრძელდეს,"- განაცხადა გიგა ბოკერიამ.
