"ქართველი ხალხი არასდროს დაივიწყებს ამერიკის შეერთებული შტატებისგან მიღებულ დახმარებას,"- ამის შესახებ საქართველოს პრემიერ-მინისტრმა ბიძინა ივანიშვილმა ამერიკის შეერთებული შტატების საზღვაო სამხედრო ხომალდ "BULKELEY"-ზე გამართულ საზეიმო ღონისძიებაზე სიტყვით გამოსვლისას ისაუბრა.
"ქართველი ხალხი არასოდეს დაივიწყებს, როდესაც 1990-იანი წლების შემდგომ, ჩვენს მოქანცულ და დაუძლურებულ ქვეყანას პირველ რიგში მხარში ამერიკის შეერთებული შტატები დაუდგა და მათი მხრიდან დიდი დახმარება მივიღეთ.
ისიც სიმბოლურია, რომ ეს დახმარებები ძირითადად, საზღვაო გზით ხორციელდებოდა. სიამოვნებით შეიძლება აღვნიშნოთ, რომ დღეს ჩვენ არა მარტო უსაფრთხოების მხარდაჭერას და ამერიკის შეერთებული შტატების მხრიდან მხრის შედგმას ვსაჭიროებთ, არამედ, ჩვენი ჯარისკაცები ამერიკელ სამხედროებთან ერთად ავღანეთში მშვიდობის დაცვას ახერხებენ,"- განაცხადა ბიძინა ივანიშვილმა.
ცნობისთვის, საქართველოს პრეზიდენტი მიხეილ სააკაშვილი და პრემიერ-მინისტრი ბიძინა ივანიშვილი ამერიკის შეერთებული შტატების საზღვაო ხომალდ "BULKELEY"-ზე გამართულ ოფიციალური საზეიმო ღონისძიებას დაესწრნენ.
აღნიშნულ ღონისზიებაზე საქართველოს ხელისუფლების უმაღლესი პოლიტიკური თანამდებობის პირებს მასპინძლობას საქართველოში ამერიკის შეერთებული შტატების ელჩი რიჩარდ ნორლანდი და ხომალდ "BULKELEY"-ს კაპიტანი უწევდნენ.
საზეიმო ღონისძიებას საქართველოს უმაღლესი საკანონმდებლო ორგანოს თავმჯდომარე დავით უსუფაშვილი, თავდაცვის მინისტრი ირაკლი ალასანია, შინაგან საქმეთა მინისტრი ირაკლი ღარიბაშვილი, ენერგეტიკის მინისტრი და ვიცე-პრემიერი კახი კალაძე, საგარეო საქმეთა მინისტრი მაია ფანჯიკიძე და ხელისუფლების სხვა წარმომადგენლებიც დაესწრნენ.
ამერიკული სამხედრო საზღვაო ხომალდი "BULKELEY" საქართველოს ტერიტორიულ წყლებში 10 აგვისტოს შემოვიდა. 2-დღიანი ვიზიტის ფარგლებში დაგეგმილია ფართომასშტაბიანი სამხედრო წვრთნები .