საქართველოს პრემიერ-მინისტრმა ბიძინა ივანიშვილმა ომში დაღუპულთა ხსოვნის სიმბოლოს - წითელი ყაყაჩოს გულსაბნევის მნიშვნელობა არ იცოდა.
ამერიკის შეერთებული შტატების საზღვაო ხომალდ "BULKELEY"-ზე გამართულ ოფიციალურ საზეიმო ღონისძიებაზე საქართველოს პრემიერ მინისტრი ქვეყნის პრეზიდენტის ყაყაჩოს გულსაბნევის დანიშნულებით და წარმომავლობით დაინტერესდა.
ბიძინა ივანიშვილის კითხვაზე: - რა გიკეთია გულზე, რა არის ეს? რას ნიშნავს? სად იშოვე?
მიხეილ სააკაშვილმა უპასუხა: - გაშოვნინებ თუ გინდა, მოგიხერხებ რაღაცას. ეს არის ჩვენი დაღუპული ჯარისკაცების სამახსოვრო სიმბოლო.
ცნობისთვის, საქართველოს პრეზიდენტი მიხეილ სააკაშვილი და პრემიერ-მინისტრი ბიძინა ივანიშვილი ამერიკის შეერთებული შტატების საზღვაო ხომალდ "BULKELEY"-ზე გამართულ ოფიციალური საზეიმო ღონისძიებას დაესწრნენ.
აღნიშნულ ღონისზიებაზე საქართველოს ხელისუფლების უმაღლესი პოლიტიკური თანამდებობის პირებს მასპინძლობას საქართველოში ამერიკის შეერთებული შტატების ელჩი რიჩარდ ნორლანდი და ხომალდ "BULKELEY"-ს კაპიტანი უწევდნენ.
საზეიმო ღონისძიებას საქართველოს უმაღლესი საკანონმდებლო ორგანოს თავმჯდომარე დავით უსუფაშვილი, თავდაცვის მინისტრი ირაკლი ალასანია, შინაგან საქმეთა მინისტრი ირაკლი ღარიბაშვილი, ენერგეტიკის მინისტრი და ვიცე-პრემიერი კახი კალაძე, საგარეო საქმეთა მინისტრი მაია ფანჯიკიძე და ხელისუფლების სხვა წარმომადგენლებიც დაესწრნენ.
ამერიკული სამხედრო საზღვაო ხომალდი "BULKELEY" საქართველოს ტერიტორიულ წყლებში გუშინ შემოვიდა. 2 დღიანი ვიზიტის ფარგლებში დაგეგმილია ფართომასშტაბიანი სამხედრო წვრთნები .