საქართველოს პრეზიდენტი მიხეილ სააკაშვილი და პრემიერ-მინისტრი ბიძინა ივანიშვილი ამერიკის შეერთებული შტატების საზღვაო ხომალდ "BULKELEY"-ზე ოფიციალურ საზეიმო მიღებაზე იმყოფებიან.
საქართველოს ხელისუფლების უმაღლესი პოლიტიკური თანამდებობის პირებს მასპინძლობას საქართველოში ამერიკის შეერთებული შტატების ელჩი რიჩარდ ნორლანდი და ხომალდ "BULKELEY"-ს კაპიტანი უწევენ.
საზეიმო ღონისძიებას საქართველოს უმაღლესი საკანონმდებლო ორგანოს თავმჯდომარე დავით უსუფაშვილი, თავდაცვის მინისტრი ირაკლი ალასანია, შინაგან საქმეთა მინისტრი ირაკლი ღარიბაშვილი, ენერგეტიკის მინისტრი და ვიცე-პრემიერი კახი კალაძე, საგარეო საქმეთა მინისტრი მაია ფანჯიკიძე და ხელისუფლების სხვა წარმომადგენლებიც ესწრებიან.
ამერიკული სამხედრო საზღვაო ხომალდი "BULKELEY" საქართველოს ტერიტორიულ წყლებში გუშინ შემოვიდა. 2 დღიანი ვიზიტის ფარგლებში დაგეგმილია ფართომასშტაბიანი სამხედრო წვრთნები .
სანაპირო დაცვის დეპარტამენტის ოპერაციების მართვის სამმართველოს წარმომადგენლის შოთა მიროტაძის განცხადებით, ამ წუთებში ამერიკულ სამხედრო ხომალდზე საქართველოს სასაზღვრო და სანაპირო დაცვის სამსახურების წარმომადგენლები ტრენინგებს გადიან.
"გემის ვიზიტის ფარგლებში სანაპირო დაცვის პერსონალის გადამზადების მიზნით, დაგეგმილია სპეციალური სწავლებები. მცირე კატარღების ექსპლუატაციის შესახებ სწავლებები ძირითადად ხომალდზე ჩატარდება. ასევე, საქართველოს ტერიტორიული წყლების დატოვებამდე და ხომალდის გასვლის ბოლო დღეს დაგეგმილია სანაპირო დაცვის კატარღებთან ერთად ერთობლივი სწავლებები,"- განაცხადა შოთა მიროტაძემ.
