საქართველოს რეგიონული განვითარების და ინფრასტრუქტურის სამინისტრო პრეზიდენტ მიხეილ სააკაშვილს ცრუ ინფორმაციების გავრცელებისგან თავის შეკავებისკენ მოუწოდებს და მის მიერ ანაკლიაში გაკეთებულ განცხადებებს პასუხობს.
მიხეილ სააკაშვილისადმი ინფრასტრუქტურის სამინისტროს საპასუხო განცხადების ტექსტს "ჯი-ეიჩ-ენი" უცვლელად გთავაზობთ:
„დღეს საქართველოს პრეზიდენტმა მიხეილ სააკაშვილმა კიდევ ერთხელ განაცხადა, რომ ანაკლიაში მიმდინარე პროექტები შეჩერდა, რამაც მისი, როგორც საკურორტო ზონის, განვითარება შეაფერხა. პრეზიდენტი, როგორც ყოველთვის, ცრუობს. გარდა ამისა, როგორც ჩანს, ის დღემდე ვერ ასხვავებს სახელმწიფოსა და კერძო სექტორის ფუნქციებს. ანაკლიაში ინფრასტრუქტურული პროექტები რომ არ შეჩერებულა, ამას იქ მიმდინარე სამუშაოებიც ადასტურებს. ანაკლიაში ამ დროისთვისაც მიმდინარეობს საავტომობილო გზის სარეაბილიტაციო სამუშაოები. გარდა ამისა, ერთი თვის წინ ხელი მოეწერა 60 მილიონი ლარის ღირებულების პროექტს, რომლითაც, ფოთსა და ქუთაისთან ერთად, ანაკლიას 24-საათიანი წყალმომარაგება ექნება. აღნიშნული პროექტის ფარგლებში სამუშაოები სულ მალე დაიწყება. ამ ორი ინფრასტრუქტურული პროექტის გარდა, ანაკლიაში კიდევ ერთი მასშტაბური პროექტი იწყება - ესაა ანაკლიის 4-კილომეტრიანი სანაპირო ზოლის ტეტრაპოდებით გამაგრება. მსგავსი მეთოდით საქართველოში ნაპირსამაგრი სამუშაოები ჯერ არ ჩატარებულა. ანაკლიის ნაპირდაცვის პროექტი პირველია, რომელიც რეალურად მოხსნის ზღვის მიერ სანაპირო ზოლის მიტაცების საფრთხეს (იხილეთ ლინკი http://www.youtube.com/watch?v=xiu_lY7DHZI&feature=youtu.be ). ამავე პროექტით, ნაპირსამაგრ სამუშაოებთან ერთად, დაგეგმილია ანაკლიის პლაჟის კეთილმოწყობაც, რაც კურორტს ტურისტებისთვის გაცილებით მიმზიდველს გახდის. რაც შეეხება ანაკლიაში სასტუმროების მშენებლობას, არაერთხელ გვითქვამს და ახლაც მკაფიოდ ვაცხადებთ, რომ ეს არ არის სახელმწიფოს ფუნქცია. საქართველოს ხელისუფლება არ დაუშვებს, სახელმწიფომ ბიუჯეტის ხარჯზე აშენოს სასტუმროები და კაფეები და ამაში ათეულ მილიონობით ლარი გაფლანგოს ისე, როგორც ამას წინა ხელისუფლება აკეთებდა. სახელმწიფოს ფუნქცია ადგილებზე საჯარო ინფრასტრუქტურის მოწესრიგება და ბიზნესის განვითარებისთვის ხელსაყრელი პირობების შექმნაა. ანაკლიაში მიმდინარე ყველა ინფრასტრუქტურული პროექტი მისი, როგორც პერსპექტიული საკურორტო ზონის, განვითარებას უწყობს ხელს და სულ მალე შევქმნით ისეთ პირობებს, რომ ეს ადგილი როგორც ტურისტისთვის, ისე ბიზნესის განვითარებისთვის უფრო მიმზიდველი გახდეს, ვიდრე ეს ამ წლების მანძილზე იყო. კიდევ ერთხელ მოვუწოდებთ მიხეილ სააკაშვილს, უარი თქვას ცრუ ინფორმაციის გავრცელებისა და საზოგადოების შეცდომაში შეყვანისგან",- ნათქვამია რეგიონული განვითარების და ინფრასტრუქტურის სამინისტროს განცხადებაში.
ცნობისთვის, საქართველოს პრეზიდენტმა მიხეილ სააკაშვილმა დღს ანაკლიაში სტუმრობისას ადგილზე მიმდინარე ინფრასტრუქტურული პროექტების სამუშაოები დაათვალიერა და განაცხადა, რომ "აუცილებელია ამ პროექტების გაგრძელება, რადგან, ერთი მხრივ, აქ დასაქმებული მოსახლეობა არ დარჩეს უმუშევარი და მეორე მხრივ, კიდევ უფრო განვითარდეს ანაკლიის საკურორტო ზონა.
სააკაშვილის თქმით, ანაკლიის მსგავსი კლიმატი საქართველოში მხოლოდ ორ ადგილზეა - გაგრასა და ბიჭვინთაში, ამიტომ ამ ადგილის განვითარება მნიშვნელოვანია კლიმატური პირობების გათვალისწინებითაც.
