უკრაინამ და რუსეთმა ხერსონის ოლქის ოკუპირებულ ქალაქ ოლეშკიში დროებითი ცეცხლის შეწყვეტის შესახებ შეთანხმება დაადასტურეს. შეთანხმების შესახებ მანამდე თეთრმა სახლმა განაცხადა.
23 ოქტომბერს შესაბამისი განცხადებები უკრაინის უმაღლესი რადის ადამიანის უფლებათა კომისარმა დმიტრო ლუბინეცმა და რუსეთის შეიარაღებული ძალების გენერალური შტაბის უფროსმა ვალერი გერასიმოვმა გაავრცელეს.
გერასიმოვის განცხადებით, რუსი სამხედროები 27 ოქტომბრის დილის 04:00 საათიდან ხერსონის მიმართულებით ცეცხლს შეწყვეტენ, რათა ჰუმანიტარული კოლონის უსაფრთხო გადაადგილება და ადგილობრივი მოსახლეობის ევაკუაცია უზრუნველყონ.
უკრაინის ომბუდსმენ დმიტრო ლუბინეცს დროებითი ზავის ამოქმედების კონკრეტული თარიღი არ დაუსახელებია. მან მელანია ტრამპს უკრაინულ და რუსულ მხარეებს შორის მოლაპარაკებების კოორდინაციისთვის მადლობა გადაუხადა. მისი თქმით, შეთანხმება ჰუმანიტარული დახმარების მიწოდებისა და მშვიდობიანი მოსახლეობის უსაფრთხო ევაკუაციის შესაძლებლობას ითვალისწინებს.
„დღეს ოლეშკის შესახებ მთელმა მსოფლიომ იცის და ყველაფერს ვაკეთებთ, რომ იქ მყოფი ჩვენი მოქალაქეები გადავარჩინოთ. ოპერაცია უკიდურესად რთულია და რამდენიმე ეტაპად განხორციელდება“, - განაცხადა ლუბინეცმა.
შეგახსენებთ, თეთრმა სახლმა გაავრცელა განცხადება, რომლის თანახმად, აშშ-ის პირველი ლედის, მელანია ტრამპის ძალისხმევის შედეგად, რუსეთი და უკრაინა ხერსონის ოლქში, რუსეთის მიერ ოკუპირებულ ქალაქ ოლეშკიში, დროებით ცეცხლის შეწყვეტაზე შეთანხმდნენ.
