"თანახმა ხართუ თუ არა 2014 წელს ქვეყანაში ვადამდელი საპარლამენტო არჩევნები ჩატარდეს?"- ამ კითხვით რეფერენდუმის ცენტრალური საარჩევნო კომისიაში გამართულ შეხვედრაზე რამდენიმე არასამთავრობო ორგანიზაციის წარმომადგენლებისგან დაკომპლექტებულმა საინიციატივო ჯგუფის წევრებმა იმსჯელეს.
პოლიტპატიმართა უფლებების დამცველები და სხვადასხვა არასამთავრობო ორგანიზაციების წარმომადგენლები თანხმობის მიღების შემთხვევაში მოქალაქეთა ხელმოწერების შეგროვების დაწყბასაც გეგმავენ.
"ჩვენ შეხვედრაზე განვაცხადეთ, რომ ამ კითხვას, ასევე თარიღს და შინაარსს ძალაში ვტოვებთ. როგორც ჩანს, ცენტრალურმა საარჩევნო კომისიამ ეს გაიზიარა. საბოლოო პასუხის გასაცემად მათ ვადა 22 აგვისტომდე აქვთ და რეფერენდუმის წინადადების არსობრივი განხილვა სწორედ ამ პერიოდში მოხდება,"- განაცხადა შეხვედრის ერთ-ერთმა მონაწილემ ნანა კაკაბაძემ.
ადვოკატ გელა ნიკოლეიშვილის განცხადებით "2012 წლის პირველი ოქტომბრის საპარლამენტო არჩევნები არაორდინალურ გარემოში ჩატარდა და რადგან უმაღლეს საკანონმდებლო ორგანოში წარმოადგენილი დეპუტატები საზოგადოების განწყობას არ ასახავენ, რიგგარეშე საპარლამენტო არჩევნების ჩატარება აუცილებელია".
"იყო სიტუაცია, როდესაც ერთის მხრივ, გადარჩენის და სიკვდილ სიცოცხლის საკითხი იდგა. ამიტომ ადამიანებმა ძალიან ბრმად მისცეს ხმა. რეალურად, დღეს რომ არჩევნები ჩატარდეს, ჯამში ამ ორმა პარტიამ შესაძლოა, 50%-ზე მეტი ვერ მიიღოს. დანარჩენი 50% ხალხის პოზიცია პარლამენტში ასახული არ არის, ამიტომ მიგვაჩნია, რომ ვადამდელი საპარლამენტო არჩევნები პარლამენტში საზოგადოების წარმოამდგენლებს ადექვატურად განსაზღვრავს,"- განაცხადა გელა ნიკოლეიშვილმა.
აღნიშნულ ინიციატივასთან დაკავშირებით საბოლოო პასუხს ცენტრალური საარჩევნო კომისია უფლებადამცველი ორგანიზაციების წარმომადგენლებისგან დაკომპლექტებულ ჯგუფს 22 აგვისტომდე გადასცემს.