საქართველოს პრეზიდენტი მიხეილ სააკაშვილი ქვეყნის ჩრდილოატლანტიკურ ალიანში და ევროკავშირში გაწევრიანებაზე უარის შესაძლო თქმის შესახებ გაკეთებულ განცხადებას განმარტავს.
პრეზიდენტის თქმით, მის მიერ აღნიშნულ საკითხზე გაკეთებული განცხადება "მოკლე მახსოვრობის მქონე, ჩასაფრებულმა ელემენტებმა არასწორი ინტერპრეტაციით გაიგეს".
"მათ გასაგონად, ვისაც ჩემი გუშინდელი ინტერვიუს მოსმენის შემდეგ (სადაც ვსაუბრობდი ჩემს მცდელობებზე თავიდან აგვეცილებინა ქვეყნის ომით განადგურება) ცდუნება გაუჩნდათ ეჭვქვეშ დაეყენებინათ ევროატლანტიკური იდეალებისა და დასავლეთთან ურთიერთობის მიმართ ჩემი ერთგულება, მინდა ვთქვა, რომ ნებისმიერი პოლიტიკოსის, მით უმეტეს - პრეზიდენტის საქმიანობა მის მიერ წლების განმავლობაში გატარებული პოლიტიკით ჯამდება. პრეზიდენტ შევარდნაძის მუდმივი ყოყმანისა და უმისამართო დრეიფის შემდეგ ჩემი საქმიანობის ერთ-ერთი მთავარი ნიშნული არის ის ჩანაწერი, რომელიც 2008 წლის ბუქარესტის სამიტზე ნატოს ოფიციალურ დოკუმენტებში გაჩნდა: „საქართველო გახდება ნატოს წევრი". ვარდების რევოლუციამდე ასეთ ჩანაწერზე ვარაუდის გამოთქმაც კი დასაცინი გახდებოდა. უნდა აღინიშნოს, რომ ისტორიულად უკრაინისა და საქართველოს გარდა არცერთ ნატოს კანდიდატ ქვეყანას არ მიუღია წინასწარ ამ ჩანაწერის მსგავსი სიძლიერის მყარი გარიანტია. ჩვენ მიერ გატარებული პოლიტიკის შედეგი იყო ის, რომ 2008 წლის აგვისტოში მთელი დემოკრატიული სამყარო ფეხზე დადგა ქართული სახელმწიფოებრიობის გადასარჩენად, რაც ასევე წარმოუდგენელი იქნებოდა 2004 წლის შემდეგ გატარებული რეფორმების წინა პერიოდის საქართველოში.საერთაშორისო მხარდაჭერამ ქართული შეიარაღებული ძალების თავდადებასა და ჩვენი მრავალეთნიკური ერის ერთიანობასთან ერთად მოახდინა სასწაული და რუსეთის არმიამ ვერ შეძლო ის, რაც მანამდე ბალტიის ქვეყნებში, აღმოსავლეთ პოლონეთში, უნგრეთში, ჩეხოსლოვაკიასა და ავღანეთში განახორციელა - ჩვენი ქვეყნის სახემწიფოებრიობისა და მისი დემოკრატიული წყობის მოსპობა. და თუ გგონიათ, რომ ეს მარტო ჩემი სიტყვებია, გთხოვთ, ყურადღებით გაეცნოთ ნატოს გენერალური მდივნის ამ ცოტა ხნის წინ გამოგზავნილ წერილს, სადაც, ვფიქრობ, ყველაფერი კარგადაა ნათქვამი. აქვე მინდა აღვნიშნო, ძალიან ვამაყობ, რომ პირველად ჩემი პრეზიდენტობის დროს საქართველოში რამდეჯნერმე გაიმართა ჩრდილოატლანტიკური საბჭოს შეხვედრა. საქართველო ბალკანეთის ქვეყნებთან ერთად გადაყვანილ იქნა ნატოს ასპირანტი ქვეყნების კატეგორიაში. იმედია, საქართველოს ახალი მთავრობა არა მხოლოდ არ მოკლავს მთელ ამ დიდი პროგრესს, არამედ გააღრმავებს მუშაობას ამ მიმართულებით. მაგრამ ამისთვის აუცილებელია, რომ ქვეყნის შიგნით რეფორმები არა მხოლოდ არ შეჩერდეს, არამედ დაჩქარებული ტემპით გაგრძელდეს. უარი ვთქვათ 2004 წლამდე მდგომარეობაში დაბრუნების მცდელობაზე და ვარდების რევოლუციის შემდეგ შექმნილი ინსტიტუტები კი არ ვანგრიოთ, არამედ გავაუმჯობესოთ, შევავსოთ და უკეთესები დავამატოთ. რაც შეეხება ჩვენს დამოკიდებულებას გეოპოლტიკურ საკითხებთან, მოკლე მახსოვრობის მქონე, ჩასაფრებულ ელემენტებს მინდა შევახსენო, რომ სწორედ ჩემი ინიციატივით დატოვა დსთ საქართველომ, სადაც შევარდნაძემ რუსეთის იძულებით შეგვიყვანა, სწორედ ჩემი პრეზიდენტობის დროს გაფორმდა სტრატეგიული ურთიერთობის ხელშეკრულება ამერიკის შეერთებულ შტატებთან, ასევე ჩემი და პრეზიდენტ ობამას შეთნხმების შედეგად გავხდით პირველი ქვეყანა ევროპაში, რომელთანაც ამერიკის შეერთებულმა შტატებმა ოფიციალურად გახსნა დიალოგი თავისუფალი ვაჭრობის ხელშეკრულების გაფორმების თაობაზე, ვიმეორებ, პირველი ქვეყანა მთელს ევროპაში! ვისაც ამის დანახვის უნარი აქვს, აუცილებლად დაინახავს და შეაფასებს. დანარჩენს კი ისტორია განსჯის,"- განაცხადა მიხეილ სააკაშვილმა.
ცნობისთვის, საქართველოს პრეზიდენტმა მიხეილ სააკაშვილმა ტელეკომპანია "რუსთავი 2"-სთვის მიცემულ ინტერვიუში განაცხადა, რომ "იგი ვლადიმერ პუტინს ტერიტორიების სანაცვლოდ ნატო-ში გაწევრიანებასა და აშშ-სთან მეგობრობაზე უარის თქმას დაჰპირდა, პუტინმა კი, დაუფიქრებლად უპასუხა, რომ "საქართველოს ტერიტორიებს მის გეოპოლიტიკურ ორიენტაციაზე ვერ გაცვლის".
პრეზიდენტის ინფორმაციით, ამის შემდეგ რუსეთმა აფხაზეთში შეიყვანა 26 ეშელონი, მათ შორის "გრადის" და "სმერჩის" ტიპის სისტემები, ოჩამჩირეში, გალსა და ჯავაში კი ბაზების მშენებლობა დაიწყო.
"ჩვენ ეუთო-ს მექანიზმების ჩართვა მოვითხოვეთ, რაც რუსეთმა დაბლოკა", - აღნიშნა სააკაშვილმა და ვლადიმერ პუტინისთვის მიწერილი წერილიც გაიხსენა რომლის თანახმად, რუსეთის ფედერაციის პოლიტიკურ ხელმძღვანელობას მან მოლაპარაკება შესთავაზა, თუმცა პასუხად დამცინავი უარი მიიღო.
"მაისში ჩვენი უპილოტო საფრენი აპარატი ჩამოაგდეს, რის შემდეგაც რკინიგზელების მეორე ბატალიონი შევიდა აფხაზეთში. ამის შემდეგ მივწერე მედვედევს წერილი, რომელიც ვფიქრობ, ისტორიკოსების კამათის საგანი გახდება. ჩვენ მათ ლტოლვილების შეყვანის სანაცვლოდ კოდორის ჩრდილოეთით გადანაცვლება შევთავაზეთ. ლტოლვილები შევიდოდნენ საერთაშორისო ადმინისტრაციის ქვეშ, სამაგიეროდ დავპირდით, რომ დავუკანონებდით ეკონომიკურ ინტერესს ბიჭვინთაში, გაგრასა და სოხუმში, სოხუმის აეროპორტს, რკინიგზას, ანუ დე-ფაქტო ვაკანონებდით მათ ინტერესებს საქართველოს მნიშვნელოვან ნაწილში. მათ უარი განაცხადეს და მედვედევმა მომწერა, დაივიწყეთ ლტოლვილები და ტერიტორიაო. ამის შემდეგ მედვედევს პეტერბურგში შევხვდი, სადაც რუსეთის პრეზიდენტი ჩემს მოხიბვლას ცდილობდა, თუმცა მაინც ეტყობოდა, რომ "ტყემალზე იჯდა". რუსეთის ისტორიაში ხშირად იყო, რომ საიდანღაც მოჰყავდათ არარაობა, რომელიც ყველას აჯდებოდა თავზე. ამიტომ ჩვენ მის ამბიციებს ვახალისებდით. ერთი-ორჯერ გაჰკრა კბილი პუტინს შეხვედრაზე, თუმცა ეს მარტივად მისახვედრი ფორმალობა იყო", - განაცხადა მიხეილ სააკაშვილმა.
