დღეს რომ სასამართლოს ბაჩო ახალაია დამნაშავედ ეცნო, ალბათ ამ წუთისთვის ის პრეზიდენტის მიერ იქნებოდა შეწყალებული, - ამის შესახებ დავით უსუფაშვილმა ჟურნალისტებთან საუბრისას განაცხადა. მისი თქმით, ახალაიას ბრალი სხვა საქმეზეც აქვს წაყენებული და სასამართლო პროცესი გრძელდება. „ჩვენ ყველამ უნდა ვისწავლოთ სასამართლო გადაწყვეტილებისადმი დამორჩილება", - აღნიშნა უსუფაშვილმა.
შეგახსენებთ, რომ თბილისის საქალაქო სასამართლომ ბაჩო ახალაია თავდაცვის მინისტრობის პერიოდზე წაყენებულ ბრალში უდანაშაულოდ სცნო და აღმკვეთი ღონისძიება პატიმრობა გააუქმა. სასამართლომ ასევე უდანაშაულოდ სცნო საქმეზე დაკავებული შვიდი პირიც.
საქართველოს თავდაცვის ყოფილ მინისტრს ბაჩო ახალაიასა და მასთან ერთად ბრალდებულების, სამხედროების მიმართ არაადამიანური მოპყრობისა და ზვიად აბესაძისთვის თავისუფლების უკანონო აღკვეთის საქმეზე გადაწყვეტილება მოსამართლემ დღეს გამოაცხადა. ახალაიასთან ერთად, ამ საქმეზე ბრალდებული იყო კიდევ 7 პირი, მათ შორის გაერთიანებული შტაბის ყოფილი უფროსი გიგი კალანდაძე, მე-4 ქვეითი ბრიგადის ყოფილი ხელმძღვანელი ზურაბ შამათავა, სად-ის წარმომადგენელი გაგა მკურნალიძე, სერჟანტი ალექსანდრე გორდაძე, მერაბ კიკაბიძე, მანუჩარ დარასელია და გიორგი კინწურაშვილი. დარასელია და კინწურაშვილი ძებნილებად ითვლებიან, ხოლო კალანდაძე, გორდაძე, კიკაბიძე და შამათავა გირაოთი არიან პატიმრობიდან გათავისუფლებული.
