,,ნაციონალური მოძრაობის" დეპუტატის გიორგი ვაშაძის განმარტებით ,,ქართული ოცნება" ხელს უშლის დემოკრატიული წინასაარჩევნო პროცესის ჩატარებას. როგორც დღეს გამართულ პრესკონფერენციაზე ვაშაძემ განმარტა ხელისუფლება პირდაპირ დაკავებულია იმით, როგორმე ჩაშალოს ,,ნაციონალური მოძრაობის" პრაიმერი.
,, ძალიან სამწუხაროა, რომ ხელისუფლება პირდაპირ დაკავებულია იმით, როგორმე ჩაშალოს ის პროცესი რასაც ,,ნაციონალური მოძრაობა" ვაკეთებთ შიდადემოკრატიის განვითარების კუთხით. ფაქტია, რომ სწორედ ,,ქართული ოცნების" ოფისებში იკრიბებოდა ის ხალხი და ჩვენ გვაქვს კონკრეტული სახელები და გვარები საჯარო მოხელეების, რომლებიც უშუალოდ ჩართული იყვნენ, რომ ჩაეშალათ ეს პროცესი", _განაცხადა ჟურნალისტებთან გიორგი ვაშაძემ.
მისივე განმარტებით, ,,ნაციონალური მოძრაობის"საპრეზიდენტო კანდიდატებისთვის ონლაინ ხმის მიცემა უკვე ხვალიდან დაიწყება და უკვე კვირის ბოლოს შეჯამდება პრაიმერის შედეგები. როგორც ვაშაძემ განაცხადა თბილისში ,,ნაციონალური მოძრაობის" მორიგი პრაიმერი შაბათს გაიმართება.
