საფრანგეთში სამუშაო ვიზიტის ფარგლებში საქართველოს საგარეო საქმეთა მინისტრი საფრანგეთის სენატში საქართველოსთან და კავკასიასთან მეგობრობის ჯგუფის წარმომადგენლებს შეხვდა. შეხვედრას საფრანგეთ-საქართველოს მეგობრობის ჯგუფის ხელმძღვანელი ალენ გურნაკი ესწრებოდა.
შეხვედრაზე მინისტრმა სენატორებს ინფორმაცია მიაწოდა საქართველოში მიმდინარე პოლიტიკურ პროცესებზე, მთავრობის საქმიანობაზე, საგარეო პოლიტიკურ საკითხებზე. სენატორები დაინტერესდნენ საქართველო-რუსეთის ურთიერთობის საკითხებით, კოაბიტაციის პირობებში მთავრობის საქმიანობით და მომავალი საპრეზიდენტო არჩევნებით.
როგორც შეხვედრის დასრულების შემდეგ საფრანგეთ-საქართველოს მეგობრობის ჯგუფის ხელმძღვანელმა სენატორმა ალენ გურნაკმა განაცხადა ამ ჯგუფის მისიაა დაეხმაროს საქართველოს და ხელი შეუწყოს საფრანგეთ-საქართველოს ურთიერთობების კიდევ უფრო განვითარებას, "ჩემი აზრით, ძალიან დიდი პოტენციალი არსებობს ორი ქვეყნის ურთიერთობის განვითარების. საქართველოში ახლა ახალი პოლიტიკური ვითარება დამყარდა და ჩვენთვის ძალიან მნიშვნელოვანი იყო მიგვეღო ინორმაცია იმის შესახებ, თუ როგორ ვითარდება ურთიერთობები იგივე კოაბიტაციის რეჟიმში. ჩვენ ვართ საქართველოს მეგობრები და დიდი ინტერესით ვაკვირდებით თქვენს ქვეყანაში მიმდინარე პროცესებს"-განაცხადა სენატორმა.
შეხვედრის დასრულების შემდეგ საქართველო-საფრანგეთის მეგობრობის ჯგუფის ხელმძღვანელმა საქართველოს საგარეო საქმეთა მინისტრს სენატის ბიბლიოთეკა დაათვალიერებინა.
