,,ყველა პირი რომელიც მონაწილეობდა, გეგმავდა წამებასა და არაადამიანურ მოპყრობას უნდა დაისაჯოს კანონის მთელი სიმკაცრით", -აცხადებენ ,,ნაციონალურ მოძრაობაში" სამეგრელოში აღმოჩენილ სამალავებთან დაკავშირებით მიმდინარე გამოძიების კომენტირებისას.
საპარლამენტო უმცირესობის წევრები მოითხოვენ, რომ შეიქმნას საქართველოს პარლამენტის საგამოძიებო კომისია რომელიც წამებისა და არაადამიანური მოპყრობის საკითხს გამჭვირვალედ, საფუძვლიანად და მიუკერძოებლად გამოიძიებს.
,, ჩვენ ვთვლით, რომ საქმე გვაქვს იმდენად მძიმე დანაშაულთან, რომ, ყოველგვარი პოლიტიკური სპეკულაციის გარეშე, სრულიად მკაფიოდ უნდა ითქვას - ყველა პირი რომელიც მონაწილეობდა, გეგმავდა წამებასა და არაადამიანურ მოპყრობას და ავრცელებდა ამის ამსახველ მასალას უნდა დაისაჯოს კანონის მთელი სიმკაცრით. აღნიშნულთან დაკავშირებით, ,,ერთიანი ნაციონალური მოძრაობის" საპარლამენტო ფრაქცია საჭიროდ თვლის შეიქმნას საქართველოს პარლამენტის საგამოძიებო კომისია რომელიც წამებისა და არაადამიანური მოპყრობის საკითხს გამჭვირვალედ, საფუძვლიანად და მიუკერძოებლად გამოიძიებს. საგამოძიებო კომისიის შექმნა აუცილებელია იმისათვის, რომ სამართალდამცავმა სტრუქტურებმა გამოიყენონ ამ აღმაშფოთებელი ფაქტების გამოძიების პროცესი და მისი მიმდინარეობისას მოპოვებული მტკიცებულებები არა პოლიტიკური ოპოზიციის წინააღმდეგ კამპანიის საწარმოებლად, არამედ რეალური დამნაშავეების გამოსავლენად და დასასჯელად.
ამ კონტექსტში მნიშვნელოვანია, რომ უახლოეს წარსულში, ადგილი ჰქონდა ციხეში პატიმართა წამებაში ერთ-ერთი მთავარი მონაწილის, ვლადიმერ ბედუკაძის, პოლიტიკური მოტივებით, სისხლის სამართლის პასუხისმგებლობისაგან მთლიანად გათავისუფლებას. ასევე, სავარაუდოდ პოლიტიკური მიზეზებით, პატიმართა წამებაში მონაწილე სხვადასხვა პირებმა, მათ შორის ბორის ფარულავამ (მეტსახელად ბუბუ) და სხვებმა უკვე დატოვეს საპატიმროები. იგივე საქმეში მონაწილე კიდევ ხუთ პირს მიესაჯა არაადექვატურად რბილი სასჯელი. ამასთან, სხვადასხვა სახის უკანონო და დანაშაულებრივ საქმიანობაში ჩართული პირების მიმართ გამოძიება დაუსაბუთებელ ლმობიერებას იჩენს, თუკი ეს პირები მოქმედი ძალოვანი სტრუქტურების წევრები, ხელმძღვანელები ან მათი მფარველობის ქვეშ მყოფი პირები არიან. ამის მაგალითია შინაგან საქმეთა მინისტრის მოადგილე გელა ხვედელიძისთვის არაადექვატურად მსუბუქი სასჯელის მოთხოვნა. ის მოხელეები კი რომელთაც თბილისის საქალაქო სასამართლოს თავმჯდომარის თანაშემწეს პირადი ცხოვრების ამსახველი მასალით დაშანტაჟებაში მონაწილეობდნენ ჯერაც დაუსჯელნი არიან", -აცხადებენ ,,ნაცმოძრაობაში" და იმედს გამოთქვამენ, რომ პარლამენტი საგამოძიებო კომისიის შექმნით შეძლებს თავიდან აიცილოს პოლიტიკური მიკერძოება და დაადგენს ობიექტურ ჭეშმარიტება.
