მელორ ვაჩნაძე ვანო ჩხარტიშვილს პასუხობს და თავადაც სასამართლოსთვის მიმართვას აპირებს. ნაჩნაძის მიერ გავრცელებულ განცხადებაში აღნიშნულია, რომ ვანო ჩხარტიშვილის "ბენეფისი საქართველოში მალე დასრულდება".
"მიუხედავად ეთიკის ნორმებისა, თავს უფლებას ვერ მივცემ, რომ ბატონოთი მოვიხსენიო ივანე ჩხარტიშვილი, რომელიც სისხლის სამართლის დამნაშავეა და რომლის ადგილიც ციხეშია!!! დღეს ამ ადმიანმა, თავისი ადვოკატების საშუალებით გადაწყვიტა , პატივის, ღირსებისა და საქმიანი რეპუტაციის შელახვისათვის , ჩემი და ჩემი მეგობრების წინააღმდეგ სასამართლოში სარჩელი შეიტანოს. ეს არის მისი კონსტიტუციური უფლება და მე მივესალმები მისი მხრიდან აღნიშნული უფლების რეალიზაციის განხორციელების სურვილს.
ამის საპასუხოდ, თავადაც ვაპირებ, ანალოგიური სარჩელით მივმართო სასამართლოს და ივანე ჩხარტიშვილს პასუხი ვაგებინო იმ ბინძური ბრალდებებისათვის , რომლებიც უკანასკნელი საათების განმავლობაში ისმის, ჩემი და ჩემი მეგობრების მისამართით. ასევე მზად ვარ სასამართლოში შევხვდე ჩხარტიშვილს, თუმცა მეეჭვება, რომ ეს პროცესი შედგეს...
საბედნიეროდ, ჩვენ უკვე სამართლიან ქვეყანაში ვცხოვრობთ და სანამ სასამართლო სამოქალაქო დავას განიხილავს, დარწმუნებული ვარ ივანე ჩხარტიშვილი სისხლის სამართლის წესით პასუხს აგებს ყველა იმ დანაშაულზე, რომელიც მან ჩაიდინა. ეს დანაშაულები კი მრავლადაა. ივანე ჩხარტიშვილი არის, ყოფილი კორუმპირებული ჩინოვნიკი, ის დამნაშავეა ქართველი ხალხის წინაშე, რომელთა ანაბრებიც მიითვისა, დამნაშავეა ბადრი პატარკაციშვილის ოჯახის წინაშე, რომლის ქონებაც მიისაკუთრა, და კიდევ ბევრი ადამიანის წინაშე, რომელთა ძარცვით მილიონები დააგროვა!!!
გამოძიება და სასამართლო დაამტკიცებს ამ დანაშაულებს და ჩხარტიშვილის სარჩელს უკვე არავითარი საფუძველი არ დარჩება...
დარწმუნებით შემიძლია ვთქვა, რომ ჩხარტიშვილი ვერასოდეს დაამტკიცებს იმ ცრუ ბრალდებებს, რომელიც ჩემი მისამართით გამოთქვა, რადგან არასოდეს მიმიღია მონაწილეობა ბინძურ კამპანიაში, შავ პიარში და მითუმეტეს არასოდეს ჩამიტარებია დაფინანსებული აქცია. ჩვენ, ახალგაზრდები და ის მეანაბრეები, რომლებიც ჯონ გრიფინად "გადანათლულმა" ვანო ჩხარტიშვილმა გაძარცვა, შევიკრიბეთ საკუთარი სურვილით და დავაფიქსირეთ ჩვენი პროტესტი, რომელიც აბსოლუტურად ჯდება სიტყვისა და გამოხატვის თავისუფლების ჩარჩოებში. ჩემი პატივის და ღირსებისთვის შელახვისთვის კი, უკვე ციხეში მყოფი ჩხარტიშვილი, აუცილებლად აგებს პასუხს და მე ამ პროცესს ბოლომდე მივიყვან!!!
ჩხარტიშვილს და მის დამქაშებს არც მორალური და არც სამართლებრივი უფლება არ აქვთ ასე ილაპარაკონ. მათი ბენეფისი საქართველოში მალე დასრულდება!!!", - ნათქვამია მელორ ვაჩნაძის განცხადებაში.
