„ნაციონალური მოძრაობა" განათლების მინისტრისგან ბოდიშის მოხდას მოითხოვს. როგორც „ნაციონალური მოძრაობის" მიერ გავრცელებულ განცხადებაშია აღნიშნული, 12 ივნისს განათლებისა და მეცნიერების მინისტრმა და „ქართული ოცნების" საპრეზიდენტო კანდიდატმა გიორგი მარგველაშვილმა შეცდომაში შეიყვანა საზოგადოება, როდესაც მან განაცხადა, რომ განათლების შესახებ არსებული კანონის თანახმად, უნივერსიტეტის რექტორის მოვალეობის შემსრულებელს ნიშნავს ქვეყნის პრეზიდენტი და შემოთავაზებული კანონცვლილება ამ უფლებას უბრალოდ პრემიერს გადასცემს.
„ბატონი მარგველაშვილის ეს მტკიცება არ შეესაბამება სინამდვილეს, რადგან მოქმედი კანონის მე-12 მუხლის თანახმად:„აკადემიური საბჭო რექტორის უფლებამოსილების ვადამდე შეწყვეტის შემთხვევაში ნიშნავს რექტორის მოვალეობის შემსრულებელს". მმართველი პოლიტიკური ძალის საპრეზიდენტო კანდიდატის და განათლებისა და მეცნიერების მინისტრის მიერ ასეთი მტკნარი სიცრუის გავრცელება არის უაღრესად აღმაშფოთებელი. ან მან ეს სიცრუე უნებლიეთ გაავრცელა, რა შემთხვევაშიც საქმე გვაქვს აშკარა არაკომპეტენტურობასთან.
თუ ბ-ნმა მარგველაშვილმა იცრუა წინასწარი განზრახვით, ასეთ შემთხვევაში იგი მოიქცა არაკეთილსინდისიერად და განზრახ შეეცადა საზოგადოების შეცდომაში შეყვანას. ორივე შემთხვევაში, მან საზოგადოებას უნდა მოუხადოს ბოდიში"- ნათქვამია განცხადებაში.