დავით დარახველიძე აგრძელებს პირველ ოფიციალურ ვიზიტს აზერბაიჯანის რესპუბლიკაში. მინისტრმა და მინისტრის მოადგილე ნინო ჭავჭავაძემ დღეს ოფიციალური შეხვედრა გამართეს აზერბაიჯანის მილი მეჯლისში. ქართული დელეგაცია მილი მეჯლისის სპიკერის პირველ მოადგილეს ზიაფეტ ასკეროვს შეხვდა და ოკუპირებული ტერიტორიებისა და დევნილთა საკითხები განიხილეს.
მხარეებმა აღნიშნეს, რომ ოკუპირებული ტერიტორიების მხრივ საერთო პრობლემები აქვთ. როგორც აზერბაიჯანის, ისე საქართველოს ტერიტორიის 20% ოკუპირებულია და საკითხი მხოლოდ და მხოლოდ ტერიტორიული მთლიანობის ფორმატში უნდა მოგვარდეს, უნდა დასრულდეს ოკუპაცია და ქვეყნის სუვერენიტეტი და ტერიტორიული მთლიანობა უნდა იყოს დაცული.
„ბატონ ზიაფეტ ასკეროვთან საკმაოდ საინტერესო შეხვედრა გაიმართა. ვისაუბრეთ ქართულ-აზერბაიჯანულ ურთიერთობებსა და რა თქმა უნდა, კონფლიკტების თემაზე, რომელიც როგორც აზერბაიჯანისთვის, ისე საქართველოსთვის ქვეყნის ტერიტორიული მთლიანობის პრინციპით უნდა გადაწყდეს. საუბარი ასევე შეეხო 2 ქვეყნის პოლიტიკური, ეკონომიკური და კულტურული ურთიერთობების გაღრმავებას. ჩვენ საერთო პრბლემები გვაქვს, აზერბაიჯანის ტერიტორიების 20%, ისევე, როგორც საქართველოს ტერიტორიის 20% ოკუპირებულია. დევნილების და ლტოლვილების პრობლემების გადაწყვეტაც ერთნაირი ფაზაშია, აზერბაიჯანს ცოტა უპირატესობა აქვს დევნილთა საცხოვრებელი ფართობებით უზრუნველყოფის საკითხებში. როგორც ჩვენი დევნილებისთვის, ისე აზერბაიჯანელი დევნილებისთვის საკითხი მხოლოდ მაშინ გადაწყდება, როდესაც ისინი თავიანთ საცხოვრებელ ადგილებს დაუბრუნდებიან" - აღნიშნა ოკუპირებული ტერიტორიებიდან იძულებით გადაადგილებულო პირთა, განსახლებისა და ლტოლვილთა მინისტრმა დავით დარახველიძემ.
მილი მეჯლისის სპიკერის პირველ მოადგილეს ზიაფეტ ასკეროვის თქმით, მიუხედავდ იმისა, რომ არაერთ რეზოლუციაში არაერთხელ დაფიქსირდა ტერიტორიული მთლიანობის აღდგენისა და ოკუპაციის დასრულების აუცილებლობა, შედეგი ჯერჯერობით არ დამდგარა. მან საქართველოსთან არსებული ურთიერთობა დადებთად შეაფასა და თანამშრომლობისთვის მზადყოფნა გამოხატა.
„აზერბაიჯანისა და საქართველოს ურთიერთობას ჩვენ საკმაოდ დიდ ყურადღებას ვუთმობთ. ვაფასებთ ამ ურთიერთობას. საქართველო ძალიან მეგობრული ქვეყანაა. ჩვენ ერთობლივად ვახორციელებთ საკმაოდ მნიშვნელოვან პროექტებს. აღნიშნული საერთაშორისო პროექტები, რა თქმა უნდა, ემსახურება როგორც საქართველოს, ასევე აზერბაიჯანის ინტერესებს. მზად ვართ თანამშრომლობის გაღრმავებისთვის" - აღნიშნა ზიაფეტ ასკეროვმა.
ოკუპირებული ტერიტორიებიდან იძულებით გადაადგილებილ პირთა, განსახლებისა და ლტოლვილთა მინისტრი დავით დარახველიძე მესამე დღეა ბაქოში იმყოფება და ოფიციალურ შეხვედრებს მართავს. შეგახსენებთ, რომ აზერბაიჯანს ქვეყანაში მილიონამდე დევნილი და ლტოლვილი ჰყავს. საქართველოს კი 90 000-მდე იძულებით გადაადგილებული ოჯახი.