ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი ალექსი პეტრიაშვილი პოლონეთში იმყოფება, სადაც მონაწილეობას მიიღებს ვროცლავის გლობალურ ფორუმში და სიტყვით გამოვა ფორუმის სესიაზე-„ნატოს გაფართოების მომავალი". ასევე, ფორუმის ფარგლებში დაგეგმილია სახელმწიფო მინისტრის ორმხრივი შეხვედრა პოლონეთის საგარეო საქმეთა მინისტრთან რადოსლავ შიკორსკისთან.
ალექსი პეტრიაშვილი ვროცლავში ჩეხეთის რესპუბლიკიდან გაემგზავრა, სადაც სამუშაო ვიზიტი ჩეხეთის დეპუტატთა პალატის ევროპულ საქმეთა კომიტეტის თავმჯდომარე იან ბაუერთან და საგარეო ურთიერთობათა კომიტეტის თავმჯდომარის მოადგილეებთან-კატერჟინა კონეჩნასთან, ლენკა ანდრისოვასთან და რობინ ბიონიშთან შეხვედრით დაასრულა.
მხარეებმა ჩეხეთ-საქართველოს შორის ეკონომიკის, განათლებისა და კულტურის სფეროებში თანამშრომლობის გაღრმავების საკითხები განიხილეს.
ჩეხი დეპუტატები საქართველოში მიმდინარე პოლიტიკური პროცესებით დაინტერესდნენ. სახელმწიფო მინისტრმა ჩეხეთის სენატის ქვედა პალატის დეპუტატებს ინფორმაცია მიაწოდა ქვეყანაში მიმდინარე რეფორმების შესახებ.
შეხვედრებზე ალექსი პეტრიაშვილმა ხაზი გაუსვა საგარეო-პოლიტიკურ პრიორიტეტებთან დაკავშირებით საქართველოს მთავარ პოლიტიკურ ძალებს შორის არსებულ კონსენსუსს და ყურადღება გაამახვილა ამ მიმართულებით განსახორციელებელ ღონისძიებებზე, კერძოდ, საქართველოს ხელისუფლების გეგმაზე 2013 წლის შემოდგომაზე ვილნიუსში დაგეგმილ აღმოსავლეთ პარტნიორობის სამიტზე მოახდინოს ევროკავშირთან ასოცირების შეთანმებისა და ღრმა და ყოვლისმომცველი თავისუფალი ვაჭრობის სივრცის შეთანხმების პარაფირება და მნიშვნელოვან პროგრესს მიაღწიოს სავიზო ლიბერალიზაციის საკითხებში.
ჩეხური მხარის წარმომადგენლებმა, თავის მხრივ, განაცხადეს, რომ ჩეხეთის რესპუბლიკა მიესალმება საქართველოს ახალი მთავრობის მიერ ევროპული და ევროატლანტიკური ინტეგრაციის მიმართულებით გადადგმულ ნაბიჯებს და მომავალშიც განაგრძობს ამ პროცესში საქართველოს მხადაჭერას.
