ყაზახეთში 18 ქართული ღვინისა და 3 მინერალური წყლის ადგილწარმოშობის დასახელება უკვე ოფიციალურად დარეგისტრირდა, აღნიშნულის შესახებ სააგენტო „ჯი-ეიჩ-ენს" „საქპატენტიდან" აცნობეს. უწყების ინფორმაციით, დასახელებების რეგისტრაციის პროცესი გასულ წელს დაიწყო და კანონით გათვალისწინებული რამდენიმეთვიანი ექპსერტიზის პროცესის შედეგად წარმატებით დასრულდა. ყაზახეთის იუსტიციის სამინისტროს ინტელექტუალური საკუთრების კომიტეტის მიერ უკვე გაიცა შესაბამისი დამცავი დოკუმენტები, რომელიც ადასტურებს საქართველოს სახელმწიფოს მიერ 18 ქართული ღვინისა და 3 მინერალური წყლის დასახელების რეგისტრაციას. აღნიშნული რეგისტრაციით შეიქმნა მყარი სამართლებრივიმექანიზმები იმისათვის რომ თავიდან იქნეს აცილებული ყაზახეთის რესპუბლიკის ტერიტორიაზე ქართული დასახელებების უკანონო გამოყენება და დასახელებებით ნიშნადებული პროდუქციის ფალსიფიკაცია. ამასთან, რეგისტრაცია იძლევა შესაძლებლობას ყაზახეთის რესპუბლიკის ტერიტორიაზე ღვინისა და მინერალური წყლის დასახელების გამოყენების უფლება მიეცეთ მხოლოდ კანონმდებლობის თანახმად, უფლებამოსილ კომპანიებსა და ფიზიკურ პირებს, რაც თავისთავად პროდუქციის მაღალი ხარისხის უზრუნველყოფის საშუალებაა.
