ტალინში ევროპის საბჭოს საპარლამენტო ასამბლეის მონიტორინგის კომიტეტის სხდომას საქართველოს საპარლამენტო დელეგაციიდან ევროპასთან ინტეგრაციის კომიტეტის წევრები ჩიორა თაქთაქიშვილი და გიორგი კანდელაკი ესწრებოდნენ. სპეციალური მოწვევით, სხდომას უმრავლესობის მხრიდან თედო ჯაფარიძე ესწრებოდა.
სხვა საკითხებთან ერთად კომიტეტმა იმსჯელა საქართველოში 2008 წლის რუსეთ-საქართველოს ომის შემდგომ მდგომარეობაზე.
მოისმინეს მომხსენებელთა ინფორმაცია ვიზიტის შესახებ, რომელიც 12-18 მაისს საქართველოსა და რუსეთში შედგა. დელეგაციის შემადგენლობაში იყვნენ: მონიტორინგის კომიტეტის თავმჯდომარე ანდრეს ჰერკელი, მომხსენებლები საქართველოზე - ბორის სილევიჩი და მაიკლ იენსენი, მომხსენებელი რუსეთზე - ანდრეს გროსი. თავდაპირველი პროგრამის მიხედვით დელეგაცია უნდა ჩასულიყო ოკუპირებულ ტერიტორიებზე, სოხუმსა და ცხინვალში, მაგრამ ადგილობრივი დე-ფაქტო ხელისუფლების წარმომადგენლებმა უარი უთხრეს ასამბლეის წევრებს შეხვედრებზე, ამდენად ძირითადი შეხვედრები გაიმართა მოსკოვში, თბილისში და ქუთაისში.
საქართველოზე მომხსენებლებმა წარმოადგინეს მოხსენება თბილისში, ქუთაისში, აგრეთვე სამცხე-ჯავახეთში 8-11 აპრილის ვიზიტის შესახებ. გაიმართა დებატები, რომელშიც წარმოდგენილ საკითხებთან ერთად იმსჯელეს საქართველოში მიმდინარე პროცესებზე.
24 მაისს მონიტორინგის კომიტეტის ფარგლებში ჩატარდა მოსმენა გაყინული კონფლიქტების შესახებ, რომლის პირველი ნაწილი დაეთმო აფხაზეთისა და სამხრეთ ოსეთის საკითხს. აღნიშნულ სხდომაში მონაწილეობა მიიღო საგარეო ურთიერთობათა კომიტეტის თავმჯრომარემ, თედო ჯაფარიძემ და მონიტორინგის კომიტეტის წევრებმა.
აღნიშნული თემის ირგვლივ დისკუსიაში მონაწილოება მიიღეს კომიტეტის მომხსენებლებლებმა საქართველოსა და რუსეთზე ბორის სილევიჩმა და ანდრეს გროსმა. გარდა ამისა, თემაზე სიტყვით გამოვიდნენ ვლადიმერ სოკორი, ჯეიმსტაუნის ფონდის უფროსი მეცნიერ-თანამშრომელი და სვანტე კორნელი, ცენტრალური აზია-კავკასიის ინსტიტუტის სამეცნიერო კვლევების დირექტორი. საუბარი შეეხო პოსტსაბჭოთა სივრცეში მიმდინარე პროცესებს, განსაკუთრებული ყურადღება დაეთმო საქართველოს როლს ამ სივრცეში და ჩვენს ქვეყანაში მიმდინარე უმნიშვნელოვანეს მოვლენებს.
აღნიშნული მოსმენის მეორე და მესამე ნაწილი დაეთმო მთიან ყარაბაღს და ტრანზისტრიას.