27 მაისს, 11 საათზე, „თეგეტა მოტორსის" სათაო ოფისში, ევროპის განვითარებისა და რეკონსტრუქციის ბანკს, "თიბისი ბანკსა" და „თეგეტა მოტორსს" შორის გაფორმდება ხელშეკრულება, რომლის თანახმადაც, „თეგეტა მოტორსი" EBRD-ისგან, „თიბისი ბანკთან" პარტნიორობით, 22 მლნ აშშ დოლარის ოდენობის საკრედიტო რესურსს მიიღებს. აღნიშნულით, კიდევ ერთხელ მტკიცდება კომპანიის მაღალი საკრედიტო ხარისხი.
შესაბამისი ხელშეკრულება EBRD-ის დირექტორ პოლ ჰენრი ფორესტიერს, "თიბისი ბანკის" გენერალურ დირექტორ ვახტანგ ბუცხრიკიძესა და "თეგეტა მოტორსის" გენერალურ დირექტორ გიორგი მშვილდაძეს შორის გაფორმდება.
აღნიშნული რესურსით მოხდება "თეგეტა მოტორსის" არსებული ვალდებულებების რეფინანსირება და ახალი პროექტის დაფინანსება. პროექტის ფარგლებში კომპანია „თეგეტა მოტორსის" მიერ აშენდება დასავლური სტანდარტების მქონე, რეგიონში უნიკალური დიზელის სერვის ცენტრი. ობიექტი იქნება პირველი ლიცენზირებული დიზელის სერვის ცენტრი რეგიონში, რომელიც აღიჭურვება "ბოშისა" და "დენსოს" ულტრათანამედროვე დანადგარებით და მოემსახურება ნებისმიერი ტიპის დიზელის ძრავს.
