კობა დავითაშვილმა მისი და შინაგან საქმეთა მინისტრის სატელეფონო საუბრის შესახებ ისაუბრა. დეპუტატის თქმით საუბარი, ქუთაისში მომხდარ ინციდენტს შეეხო. განცხადება დავითაშვილმა „პირველი რადიოს" რადიოკლუბში სტუმრობისას გააკეთა. პარლამენტის წევრის თქმით, მასსა და ღარიბაშვილს შორის ინციდენტი ამ დროისთვის ამოწურულია. დავითაშვილმა ასევე აღნიშნა, რომ კანონი ყველასთვის თანასწორი უნდა იყოს.
„ბატონმა ირაკლიმ დამირეკა და ვისაუბრეთ ტელეფონით. მან თქვა, რომ არ იცოდა იმ ინციდენტის თაობაზე რომელიც ქუთაისში მოხდა. მე არ მაქვს საფუძველი მას არ დავუჯერო. ჩემი გაღიზიანება გამოიწვია იმან, რომ ერთი და იგივე დღეს მოხდა ორი აქცია, რომელთაგან ერთი დაარბიეს და მეორე არა. შესაძლოა მართლა არაინფორმირებულობის ბრალი იყოს. მე არ ვითხოვ, რომ ნაციონალების აქცია უნდა დარბეულიყო. მე ვითხოვ კანონის წინაშე თანასწორობას. თუ კი არსებობს მიტინგებისა და დემონსტრაციების შესახებ კანონი, სადაც წერია, რომ ქუჩის გადაკვეთისთვის საჭიროა ხუთი დღით ადრე გაფრთხილება და ასევე წერია რომ სახელმწიფო დაწებულებასთან 20 მეტრის რადიუსში არ შეიძლება მიტინგი. ორივე აქციის მონაწილეებმა დაარღვიეს ეს კანონი და შესაბამისად მათ მიმართ კანონი უნდა იყოს თანასწორი. " - განაცხადა დავითაშვილმა.