საქართველოს მთავრობა დღეს ერთი-ერთში აფიქსირებს იგივე პოზიციებს, რასაც ჩვენი ქვეყნის მნიშვნელოვან საკითხებზე აფიქსირებს რუსეთის მთავრობა. ამის შესახებ საპარლამენტო უმცირესობის წევრმა გოკა გაბაშვილმა "ოკუპირებული ტერიტორიების შესახებ" კანონში შესატანი ცვლილებების განხილვისას განცხადა.
"ნელ-ნელა, ნაბიჯ-ნაბიჯ ხდება მათი აგრესიის შედეგის აღიარება და ეს ხდება იმით, რომ უპირისპირდებით ევროპას, დასავლეთს, არ იზიარებთ მის აზრებს, მზად ხართ ყველაფერი გაუკეთოთ რუსეთს, მათ შორის ამ კანონის გაუქმება, ეს ხდება იმით, რომ საერთაშორისო მხარდაჭერას არყევთ და სამაგიეროდ, გსურთ ელაქუცოთ მტერს და გაქვთ მონური იმედი, რომ რაღაც ნაბიჯი იქნება ისეთი, რომელიც ყოფით პრობლემებს მაინც მოაგვარებს", - განაცხადა გაბაშვილმა.
გაბაშვილის თქმით, ეს მიდგომა ზნეობრივადაც და პრაგმატულადაც არასწორია.
მისივე განმარტებით, "ოკუპაციის შესახებ კანონში" ცვლილებების დამტკიცება იქნება რუსეთისთვის გაგზავნილი სიგნალი, რომ საქართველოს ხელისუფლება მზადაა მას ყველაფერი გაუკეთოს.
"
აქ არის ლაპარაკი სიგნალზე, რომელიც გინდათ გაუგზავნოთ რუსეთს, რომ თავი გაქვთ წახრილი, რომ ყველაფრისთვის მზად ხართ, ყველა შეკვეთას შეასრულებთ, რომ ნაბიჯ-ნაბიჯ გააკეთებთ იმას, რაც მათ სურთ - ახალი რეალობის აღიარება, რაც მდგომარებს იმაში, რომ ამიერკავკასიაში არა 3, არამედ 5 ქვეყანაა", - აღნიშნა გაბაშვილმა.
გაბაშვილის განცხადებით, ის, რაც რუსეთს უნდა - სამხედრო გამარჯვების გაფორმება, დღეს ხდება უმრავლესობის მიერ ღილაკებზე თითის მიჭერით.
"იცოდეთ, რომ როცა ამ კანონს ხმას მისცემთ, იქნებით ერთიანი ლავროვის არმია", - განაცხადა გაბაშვილმა.