"აფხაზეთში მცხოვრები ქართული მოსახლეობის უმრავლესობა ეთნიკური აფხაზები არიან და მათ სწორედაც რომ გამარტივებული წესით უნდა მიეცეთ კუთვნილი აფხაზური გვარების დაბრუნების საშუალება", - აცხადებს აფხაზეთის ე.წ. შს მინისტრი ოთარ ხეცია და "აფხაზეთის სახალხო ერთიანობის ფორუმის" მიერ გაკეთებულ განცხადებას იმის შესახებ, რომ "აფხაზეთის აღმოსავლეთ ნაწილში მდებარე სამი რაიონის ქართულ მოსახლეობას პასპორტები საკანონმდებლო პროცედურის დარღვევით ურიგდებათ" არ ეთანხმება. ინფორმაციას ამის შესახებ აფხაზური მედია ავრცელებს.
"ადამიანები, რომლებიც მუდმივად ცხოვრობენ გალის, ოჩამჩირის და ტყვარჩელის რაიონებში - ეს ჩვენი მოქალაქეები არიან. მათთვის მოქალაქეობის მინიჭების პროცედურა სულაც არ არის გამარტივებული, პირიქით. მოქალაქეობის მინიჭების პაკეტში აუცილებლად შედის წერილობითი უარის თქმა საქართველოს მოქალაქეობაზე. თუმცა მათ არ შეუძლიათ წარმოადგინონ დოკუმენტი საქართველოს იუსტიციის სამინისტროდან, იმიტომ ეს მათ პატიმრობას უქადის. ყველა სხვა პროცედურას ისინი გადიან", _ აცხადებს ხეცია და არ გამორცხავს, რომ აფხაზეთის ე.წ. მოქალაქეობის მინიჭებით მრავალი ადამიანი საქართველოს მოქალაქედაც რჩება, თუმცა მისივე თქმით, "აფხაზეთის ხელისუფლებას ამის დამადასტურებელი საბუთი არ აქვს".
