სერბეთში, კვირას, 25 ოქტომბერს, ვადამდელი საპარლამენტო არჩევნები იმართება, რომელიც ქვეყნის ყოფილი პრეზიდენტის, ალექსანდარ ვუჩიჩის პოლიტიკურ ძალასა და სტუდენტურ მოძრაობას შორის დაპირისპირებად განიხილება. სტუდენტური მოძრაობა თითქმის ორი წელია ვუჩიჩის წინააღმდეგ საპროტესტო აქციებს ხელმძღვანელობს.
საარჩევნო უბნები ადგილობრივი დროით 07:00 საათზე გაიხსნა და 20:00 საათამდე იმუშავებს. ხმის მიცემის უფლება თითქმის 6,5 მილიონ მოქალაქეს აქვს. ქვეყნის მასშტაბით 8 000-ზე მეტი საარჩევნო უბანია გახსნილი. საზღვარგარეთ ხმის მისაცემად 100 000-ზე მეტი ამომრჩეველია რეგისტრირებული.
ბელგრადსა და ნოვი-სადში საარჩევნო უბნებთან რიგები ჯერ კიდევ კენჭისყრის დაწყებამდე, დილის 7 საათამდე გაჩნდა.
არჩევნებში 18 საარჩევნო სია მონაწილეობს, თუმცა მთავარი კონკურენცია ვუჩიჩის მემარჯვენე სერბეთის პროგრესულ პარტიასა და სტუდენტების მიერ მხარდაჭერილ „სტუდენტურ სიას“ შორისაა. ვუჩიჩის პარტიამ პრემიერ-მინისტრობის კანდიდატად საკუთარი წარმომადგენელი წარადგინა.
არჩევნების წინ გამოქვეყნებული გამოკითხვები ურთიერთსაწინააღმდეგო შედეგებს აჩვენებდა, რის გამოც კენჭისყრა ბოლო წლების ერთ-ერთ ყველაზე არაპროგნოზირებად არჩევნებად მიიჩნევა.
საზოგადოებრივი აზრის გამოკითხვები კონკურენტებს შორის დაძაბულ ბრძოლას პროგნოზირებს. ხუთშაბათს გამოქვეყნებული Ipsos-ის გამოკითხვის თანახმად, ვუჩიჩის სერბეთის პროგრესული პარტია (SNS) 47%-იანი მხარდაჭერით ლიდერობს, სტუდენტების მიერ მხარდაჭერილ საარჩევნო სიას კი 40% აქვს. თუმცა სხვა გამოკითხვებში უპირატესობა სტუდენტურ მოძრაობას ენიჭება.
სტუდენტური მოძრაობა მასშტაბური საპროტესტო აქციების შედეგად გაძლიერდა. პროტესტი ხელისუფლების წინააღმდეგ თითქმის ორი წელია გრძელდება და ქვეყნის პოლიტიკურ ცხოვრებაში ერთ-ერთ მთავარ ძალად იქცა.
