საქართველოში ვიზიტად მყოფი ავღანეთსა და პაკისტანში ამერიკის შეერთებული შტატების სპეციალური წარმომადგენელი რიჩარდ ჰოლბრუკი კრწანისის ეროვნულ სასწავლო ცენტრში იმყოფება.
რიჩარდ ჰოლბრუკი კრწანისის სასწავლო ცენტრში საქართველოს პრეზიდენტ მიხეილ სააკაშვილთან ერთად მივიდა.
ჰოლბრუკი იმ ქართველ სამხედროებს შეხვდა, რომლებიც ავღანეთის სამშვიდობო ოპერაციაში მონაწილეობის მისაღებად წვრთნებს გადიან. მიხეილ სააკაშვილმა და რიჩარდ ჰოლბრუკმა სამხედროებთან ერთად ისადილეს.
ავღანეთსა და პაკისტანში ამერიკის შეერთებული შტატების სპეციალური წარმომადგენელი ქართველი სამხედროების საცხოვრებელ პირობებს და წვრთნის სპეციფიკასაც გაეცნობა.
რიჩარდ ჰოლბრუკი საქართველოში ვიზიტით გუშინ ჩამოვიდა. ის ოფიციალურ შეხვედრებს გამართავს საქართველოს მთავრობის წარმომადგენლებთან.
ვიზიტისას განიხილება უსაფრთხოების საკითხები და ავღანეთის სამშვიდობო ოპერაციაში ქართული სამხედრო კონტინგენტის მონაწილეობა.
გავრცელებული ინფორმაციით, საუბრის ერთ-ერთი თემა, ავღანეთში სამხედრო ტვირთების ჩასატანად, საქართველოს ტერიტორიისა და სატრანსპორტო ინფრასტრუქტურის გამოყენებაც იქნება.
