ეროვნული მოძრაობის ერთ-ერთი წარმომადგენლის, პოლიტიკური გაერთიანება "იმედის" ხელმძღვანელის ირინა სარიშვილის განცხადებით, "ნაციონალების" მხრიდან ეროვნულ ინტერესებზე და ეროვნულ მოძრაობაზე საუბარი სასაცილოა.
როგორც სარიშვილმა "პრაიმტაიმის" პრესკლუბში პრესკონფერენციაზე ჟურნალისტებს განუცხადა, "ნაციონალურ მოძრაობასა" და "რესპუბლიკურ პარტიას" შორის შეთანხმება არსებობს, რომ ისინი ერთად მოახერხებენ, ახალი უმრავლესობის შექმნას და სხვადასხვა აზრზე დარჩებიან სხვადასხვა დროს.
"აქციისთვის "ნაციონალური მოძრაობა" ძალიან დიდ ხანს ემზადებოდა. ეს აქცია რომ ამა თუ იმ ფორმით შედგა, ამაში დიდი მონაწილეობა მიიღო დღევანდელმა ხელისუფლებამ. მე შეგახსენებთ დავით უსუფაშვილის გამონათქვამს, რომ მათთვის საამაყოა "ნაციონალური მოძრაობა" კარგად არის შენარჩუნებული. ეს ყველაფერი კი მიუთითებს იმაზე, რომ მივყავართ კონკრეტულ ძალებს ორპარტიული სისტემისკენ. პირობითად კოალიცია, ოცნება და მისი ე.წ. ოპოზიცია "ნაციონალური მოძრაობა". ამ ფონზე კი დღევანდელი ხელისუფლების პოლიტიკით უკმაყოფილო ადამიანები რომელთა რიცხვიც გასაგები მიზეზების გამო მცირე არ არის, თითქოს უნდა გადამისამართდეს სხვა მიმართულებით", - აცხადებს სარიშვილი.