,,საკონსტიტუციო სასამართლოს შესახებ" ორგანულ კანონში შესატანი ცვლილებების პროექტი პარლამენტმა მეორე მოსმენით - 82 ხმით ერთხმად დაამტკიცა. იურიდიულ საკითხთა კომიტეტის თავმჯდომარე ვახტანგ ხმალაძის მიერ ინიცირებულ პროექტს პარლამენტი დაჩქარებული წესით იხილავს.
იმ შემთხვევაში, თუ საკონსტიტუციო სასამართლო სადავო აქტის მოქმედებას საბოლოო გადაწყვეტილების მიღებამდე შეაჩერებს, ეს გადაწყვეტილება 30 კალენდარული დღის ვადაში უნდა მიიღოს. წინააღმდეგ შემთხვევაში, საკონსტიტუციო სასამართლოს გადაწყვეტილება 31-ე კალენდარული დღიდან ძალას დაკარგავს.
ამასთან, კანონში "განსაკუთრებული შემთხვევის" ფაქტორიც შემოდის, რომლის მიხედვითაც, საკონსტიტუციო სასამართლოს თავმჯდომარეს უფლება ენიჭება საქმის განმხილველი სასამართლოს დასაბუთებული მიმართვის საფუძველზე ვადა 15 დღით გააგრძელოს.
საპარლამენტო ოპოზიცია ვახტანგ ხმალაძის საკანონმდებლო ინიციატივას საკონსტიტუციო სასამართლოს პარალიზების მცდელობად აფასებს, თუმცა დღევანდელმა განხილვამ დებატების გარეშე ჩაიარა, რადგან სესიას უმცირესობა არ ესწრება.
