პარლამენტის ბიურომ დღევანდელი პლენარული სხდომის დღის წესრიგი განიხილა და დაამტკიცა. განსახილველ საკითხთა ნუსხიდან ამოღებული იქნა კანონპროექტი „პროკურატურის შესახებ" საქართველოს კანონში ცვლილების შეტანის თაობაზე". პროექტის განხილვა მომდევნო სასესიო კვირისთვის გადაიდო.
ბიუროს გადაწყვეტილებით სხვა საკითხებთან ერთად პლენარულ სხდომაზე პირველი მოსმენით განხილული იქნება ორგანული კანონის პროექტი „საქართველოს ორგანულ კანონში „საქართველოს შრომის კოდექსი" ცვლილების შეტანის თაობაზე". კანონპროექტით რეგულირდება შრომითი ხელშეკრულების ფორმასთან, ვადასთან, სამუშაო დროის ხანგრძლივობასთან, ზეგანაკვეთური სამუშაოს განსაზღვრასა და მის ანაზღაურებასთან დაკავშირებული საკითხები. კანონპროექტითვე განისაზღვრება, თუ რა შეიძლება ჩაითვალოს შრომითი ხელშეკრულების არსებით პირობად, ასევე რა შემთხვევაში ჩაითვლება დასაქმებულთათვის შრომითი ხელშეკრულების შეწყვეტა მასობრივ დათხოვნად. გარდა ამისა, პროექტი ითვალისწინებს დასაქმებულთა და დამსაქმებელთა გაერთიანებების საქმიანობაში ჩაურევლობასა და დასაქმებულის დისკრიმინაციის დაუშვებლობას ამ გაერთიანების წევრობის გამო.
მასალის გამოყენების პირობები
