გაეროში საქართველოს ყოფილი ელჩი და უშიშროების ყოფილი მდივანი კახა ლომაია 2008 წლის აგვისტოს ომის გამოძიების შესახებ ხელისუფლების ინიციატივას ანტისახელმწიფოებრივად აფასებს.
როგორც მან ტელეკომპანია "რუსთავი 2"-ის ეთერში, გადაცემა "პოზიციაში" აღნიშნა, ხელისუფლების გადაწყვეტილების სისრულეში მოყვანა არ შეიძლება.
მისი თქმით, უახლოესი ისტორიაში ძნელად მოიძებნება იმაზე დეტალურად გამოძიებული საქმე, როგორიც რუსეთ-საქართველოს ომია. ასევე, არსებობს სამხედრო ანალიზი, რომელიც ქართველი და დასავლელი სპეციალისტების მონაწილეობით გაკეთდა.
"ეს ინიციატივა, ფორმა და ადგილი - ეს არის ანტისახელმწიფოებრივი. მე, როგორც გაეროში საქართველოს ყოფილი ელჩი, ვამბობ სრული პასუხისმგებლობით, რომ საკმარისია საქართველოს რომელიმე ოფიციალურმა უწყებამ შექმნას დასკვნა, რომელიც რა თქმა უნდა, იმთავითვე იქნება სიცრუეზე აგებული. იმიტომ, რომ სიმართლე არის ყველა დოკუმენტში, რომელზედაც მე ვისაუბრე", - განაცხადა ლომაიამ.
მისივე თქმით, მსგავსი დასკვნა, რომელიც ოდნავ მაინც ჩრდილს მიაყენებს საქართველოს მის ერთ-ერთ ტერიტორიასთნ მიმართებაში, ჩვენი დეზინტეგრაციის პროცესი შეუქცევადი გახდება.
ლომაიას განცხადებით, არ სურს, რომ მთელი მთავრობა გახდეს დეზინტეგრაციის მთავრობა, რადგან შეცდომების კრიტიკული მასა გროვდება.
პროკურატურაში აგვისტოს ომის შემსწავლწელი საგამოძიებო კომისიის შექმნის შესასებ 11 აპრილს, მთავარმა პროკურორმა არჩილ კბილაშვილმა განაცხადა. მისი თქმით, ამ თემაზე შესაძლოა, დაიკითხოს პრეზიდენტი და ყველა ის პირიც, ვის დაკითხვასაც გამოძიება გადაწყვეტს.