12 აპრილს, 11:00 საათზე, საქართველოს კულტურისა და ძეგლთა დაცვის სამინისტროს ორგანიზებით, საქართველოს ეკონომიკისა და მდგრადი განვითარების სამინისტროს, საქართველოს ტურიზმის ეროვნული ადმინისტრაციისა და გარემოს დაცვის სამინისტროს სსიპის დაცული ტერიტორიების სააგენტოს მხარდაჭერით, გამოფენების ცენტრ ექსპო-ჯორჯიაში გაიმართება ტურიზმის მე-15 საერთაშორისო გამოფენა „Caucausus Tourism Fair-CTF 2013".
ექსპოზიციაზე ადგილობრივი კომპანიების გვერდით წარმოდგენილნი იქნებიან უცხოური კომპანიები აზერბაიჯანიდან, სომხეთიდან, თურქეთიდან, ტაილანდიდან, არაბთა გაერთიანებული საემიროებიდან.
გამოფენაზე ექსპონირებული იქნება საქართველოს კულტურისა და ძეგლთა დაცვცის სამინისტროს პროექტის „ქართული სუვენირების" ფარგლებში ქართული ტრადიციული ხალხური რეწვის გამოფენა - გაყიდვა, რომელზეც 50-მდე რეწვის ოსტატის ნამუშევარი იქნება წარმოდგენილი; ხალხური რეწვის სხვადასხვა მიმართულებები: ქართული ტექსტილი-ბატიკა, ნაქარგობა, ქსოვა, თექა ქართული ჭედურობა-სამუზეუმო თემაზე შექმნილი ქართული ჭედური ხელოვნების ნიმუშები, სამკაულები, მინანქარი, კერამიკა. დამთვალიერებელთა თვალწინ შეიქმნება რეწვის ნიმუშები ხალხური ტრადიციების მიხედვით.
გამოფენას გახსნას დაესწრებიან საქართველოს კულტურისა და ძეგლთა დაცვის მინისტრის მოადგილე მანანა ბერიკაშვილი, მინისტრის მრჩეველი გიორგი გეგეჭკორი, საქართველოს ეკონომიკისა და მდგრადი განვითარების მინისტრის პირველი მოადგილე დიმიტრი ქუმსიშვილი და გარემოს დაცვის მინისტრი ხათუნა გოგალაძე.
სუვენირების ბაზრობას ტრადიციულ ქართულ სამოსში გამოწყობილი პანტომიმის სახელმწიფო თეატრის მიმების პერფორმანსი გააფორმებს.
გამოფენა გაგრძელდება 14 აპრილამდე.
